მაია ბითაძე ოპოზიციის ალიანსში განხეთქილებაზე: ეს არის არასერიოზული ადამიანების გაერთიანება, რომელიც ძირითადად ერთმანეთის დაბულინგებითა და ქვეყნისთვის ძირის გამოთხრით არის დაკავებული

ეს არის არასერიოზული ადამიანების გაერთიანება, რომელიც ძირითადად ერთმანეთის დაბულინგებითა და ქვეყნისთვის მრავალწახნაგოვანი ფორმატით ძირის გამოთხრით არის დაკავებული, - განაცხადა საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ „დღის ქრონიკაში" ოპოზიციაში არსებულ დაპირისპირებაზე საუბრისას.

მისი თქმით, სულ ცოტა ხნის წინ მომავლის შუქურად და ბედნიერების ლოზუნგად გამოცხადებული ალიანსი დღეს დაპირისპირებისა და შეურაცხყოფის საგნად იქცა.

„რეალურად, მართლა დრამატულია, თუ არა კომიკური, ის ვითარება, რაც „ნაციონალურ მოძრაობაში" და რადიკალური ოპოზიციის ფლანგზე ვითარდება. შეიძლება ითქვას, რომ ქალთა სახეების როლი პოლიტიკურ პროცესში „ნაციონალური მოძრაობის" ეგიდით კომიკურად იქცა. ეს მუდმივი ღია დაპირისპირება, შეურაცხყოფა და არათანმიმდევრული დამოკიდებულება ქვეყანაში არსებულ ვითარებასთან მიმართებით არის სრულიად კონტექსტიდან ამოვარდნილი. ჩვენ არაერთხელ გვითქვამს, რომ შესაკრებთა გადანაცვლებით ჯამი არ იცვლება. სულ ცოტა ხნის წინ მომავლის შუქურად და ბედნიერების ლოზუნგად გამოცხადებული ალიანსი დღეს დაპირისპირებისა და შეურაცხყოფის საგნად იქცა. ძალიან პრიმიტიული და ინფანტილურია გათვლა ახალი თავმჯდომარის ნდობასთან დაკავშირებით, რომელიც საკმაოდ აქტიურია სოციალურ ქსელში. თუმცა, სერიოზულად რომ ვთქვათ, ძალიან სამწუხაროა ეს იმ პროცესისთვის, რომელიც რადიკალური ოპოზიციის ფლანგზე მიმდინარეობს. ეს კიდევ ერთხელ აჩვენებს, რომ ეს არის არასერიოზული ადამიანების გაერთიანება, რომელიც ძირითადად ერთმანეთის დაბულინგებითა და ქვეყნისთვის მრავალწახნაგოვანი ფორმატით ძირის გამოთხრით არის დაკავებული", - აღნიშნა ბითაძემ.

მისივე თქმით, ამ ადამიანების სერიოზულობა და ნდობის კოეფიციენტი ძალიან დაბლა ეცემა.