მაკა ბოჭორიშვილი: ჯერ კიდევ არიან სხვა სახელმწიფოები, მართალია მცირერიცხოვანი, თუმცა მაინც არიან, რომლებიც ე.წ. აფხაზეთისა და ოსეთის რესპუბლიკების დამოუკიდებლობას აღიარებენ. ეს ჩვენი დიპლომატიური სამსახურის დღის წესრიგში აქტიურად დგას, რომ ამ მიმართულებით ვიმუშაოთ

ვიცე-პრემიერი, საგარეო საქმეთა მინისტრი მაკა ბოჭორიშვილი „დღის ქრონიკაში“ გამოეხმაურა ნაურუს სახელმწიფოს გადაწყვეტილებას, რომელმაც ოკუპირებული აფხაზეთისა და ცხინვალის რეგიონის აღიარება ოფიციალურად გააუქმა.

წამყვანმა ჰკითხა, იმ ფონზე, როდესაც კიდევ რჩება რამდენიმე ქვეყანა, მათ შორის რუსეთი, რომელიც ოკუპირებული ტერიტორიების დამოუკიდებლობას აღიარებს, როგორ აპირებს საქართველოს ხელისუფლება მუშაობას არაღიარების პოლიტიკის საწინააღმდეგოდ.

„ნამდვილად მნიშვნელოვანი და სასიხარულოა ეს გადაწყვეტილება იმ თვალსაზრისით, რომ საქართველოს არაღიარების პოლიტიკა შედეგებს იღებს. ის ნაბიჯები, რაც იდგმება ქართული დიპლომატიური სამსახურის მიერ, არის შედეგიანი. პირველ რიგში, მისასალმებელია ნაურუს ეს გადაწყვეტილება. ჩვენ გამოვეხმაურეთ ამას და გამოვთქვით მზაობა, რომ დიპლომატიური ურთიერთობები დავამყაროთ ნაურუსთან და ვისაუბროთ ორმხრივი ურთიერთობების წინ წაწევისთვის.

საქართველოს აქვს მტკიცე პოლიტიკა, როდესაც ვსაუბრობთ ოკუპირებულ რეგიონებზე, არაღიარების პოლიტიკაზე, თუმცა ეს არაა მარტივი სამუშაო. ყოველდღიურ რეჟიმში არის მცდელობები რუსეთის მხრიდან, რომ ე.წ. აფხაზეთისა და ოსეთის რესპუბლიკების დამოუკიდებლობის აღიარების მცდელობები იყოს წარმატებული, რაც მუდმივ ყურადღებას საჭიროებს. ჯერ კიდევ არიან სხვა სახელმწიფოები, მართალია მცირერიცხოვანი, თუმცა მაინც არიან, რომლებიც ე.წ. აფხაზეთისა და ოსეთის რესპუბლიკების დამოუკიდებლობას აღიარებენ. ეს ჩვენი დიპლომატიური სამსახურის დღის წესრიგში აქტიურად დგას, რომ ამ მიმართულებით ვიმუშაოთ“, - აღნიშნა ბოჭორიშვილმა.

ნაურუმ ოკუპირებული აფხაზეთისა და ცხინვალის რეგიონის აღიარების გადაწყვეტილება ოფიციალურად გააუქმა. შესაბამისად, მათ დაუყოვნებლივ შეწყვიტეს დიპლომატიური ურთიერთობები ოკუპირებულ ცხინვალსა და აფხაზეთთან.