მაკა ბოჭორიშვილი: ნებისმიერი კონფლიქტი დაკავშირებულია მსხვერპლთან, დანაკარგებთან და ეს არის ის, რაზეც ყველამ უნდა ვეცადოთ, რომ თავიდან ავიცილოთ და ძალისხმევა არ დავიშროთ იმისათვის, რომ ჩვენს რეგიონში მიღწეული იყოს გრძელვადიანი მშვიდობა

ნებისმიერი კონფლიქტი დაკავშირებულია მსხვერპლთან, დანაკარგებთან და ეს არის ის, რაზეც ყველამ უნდა ვეცადოთ, რომ თავიდან ავიცილოთ და ძალისხმევა არ დავიშროთ იმისათვის, რომ ჩვენს რეგიონში მიღწეული იყოს გრძელვადიანი მშვიდობა, - განაცხადა საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა სტამბოლში გამართულ ერთობლივ ბრიფინგზე.

მისივე თქმით, საქართველოს პოზიცია ნათელია და ხელისუფლება მიესალმება ყველა იმ ძალისხმევას, რომელიც მიმართული კონფლიქტის მშვიდობიანი დარეგულირებისკენ.

„საქართველოს არაერთხელ განუცხადებია თავისი პოზიცია, თუ რამხელა მნიშვნელობას ვანიჭებთ ჩვენს რეგიონში მშვიდობასაა და სტაბილურობას. რა თქმა უნდა, რუსეთ-უკრაინის კონფლიქტი მძიმე უსაფრთხოების გამოწვევებს ქმნის შავ ზღვაზე, ასევე, საქართველოს ტერიტორიების ოკუპაცია რუსეთის მიერ, ესეც რა თქმა უნდა, ჩვენი რეგიონისთვის უსაფრთხოების მნიშვნელოვან გამოწვევას წარმოადგენს. ჩვენი პოზიცია არის ღია და ნათელი. ჩვენ ვემხრობით კონფლიქტის მშვიდობიან დარეგულირებას და მივესალმებით ყველა იმ ძალისხმევას, რომელიც მიმართული იქნება ამისკენ. ნებისმიერი კონფლიქტი, რა თქმა უნდა, დაკავშირებულია მსხვერპლთან, დანაკარგებთან და ეს არის ის, რაზეც ყველამ უნდა ვეცადოთ, რომ თავიდან ავიცილოთ და ჩვენი ძალისხმევა არ დავიშუროთ იმისათვის, რომ ჩვენს რეგიონში მიღწეული იყოს მშვიდობა და ეს იყოს გრძელვადიანი“,- აღნიშნა ბოჭორიშვილმა.