მაკრონი: აშშ არ წყვეტს, თუ როგორი უნდა იყოს ევროპული ან ფრანგული კანონმდებლობა

G7-ის სამიტზე საფრანგეთში ჩასვლამდე, ამერიკის პრეზიდენტი დაიმუქრა, რომ ფრანგულ ღვინოებზე გადასახადებს გაზრდიდა, რაც იქნებოდა საპასუხო რეაქცია საფრანგეთში ამერიკული ტექნოლოგიური გიგანტების შემოსავლებზე დაწესებულ გადასახადზე.

ემანუელ მაკრონმა სიმტკიცე გამოიჩინა თავისი ამერიკელი კოლეგის წინაშე, რომელიც საფრანგეთს ღვინოებსა და შამპანურებზე საბაჟო ტარიფების ახალი გაზრდით დაემუქრა.

2019 წელს საფრანგეთმა 3%-იანი გადასახადი დააწესა ტექნოლოგიური კომპანიების მიერ მის ტერიტორიაზე მიღებულ შემოსავლებზე, მათ შორის ისეთ ამერიკულ გიგანტებზე, როგორებიცაა Facebook, Amazon, Apple და Google-ის მშობელი კომპანია Alphabet. ეს თემა განსაკუთრებით სენსიტიურია დონალდ ტრამპისთვის, რომელიც აშშ-ში ამ სექტორის მხარდაჭერით სარგებლობს.

„საქმე ასე არ კეთდება“, - განაცხადა ემანუელ მაკრონმა.

„ახლა სტაბილურობაა საჭირო. ტარიფები არავისთვისაა სასარგებლო, განსაკუთრებით კი G7-ის ქვეყნებს შორის არსებული ტარიფები. ეს სიკეთეს არ მოუტანს არც იმ ეკონომიკურ სექტორებს, რომლებიც ჩვენთან ზარალდებიან, და არც შეერთებულ შტატებს“, - აღნიშნა მან.

მაკრონის თქმით, ეს ციფრული გადასახადი, რომელიც ევროპულ დონეზე იყო გადაწყვეტილი და ამოქმედებული ზოგიერთი ქვეყნის, მათ შორის საფრანგეთის მიერ, „ჩვენი კანონმდებლობის ნაწილია“.

„აშშ არ წყვეტს, თუ როგორი უნდა იყოს ევროპული ან ფრანგული კანონმდებლობა“, - დასძინა საფრანგეთის პრეზიდენტმა.