მამუკა რეხვიაშვილი: ეს დღე გვაერთიანებს და კიდევ ერთხელ გვახსენებს, რამდენად მნიშვნელოვანია ქვეყნის თავისუფლება, ერთიანობა და იმ ღირებულებების შენარჩუნება, რომლებზეც ჩვენი სახელმწიფო დგას
რუსთავში საქართველოს დამოუკიდებლობის დღის აღსანიშნავი სადღესასწაულო პროგრამა დილიდან დაიწყო.
თავისუფლების მოედანზე მიმდინარე ღონისძიებებს რუსთავის საკრებულოს თავმჯდომარე მამუკა რეხვიაშვილი, ქალაქის მერი ნინო ლაცაბიძე, საქართველოს პარლამენტში რუსთავის დელეგატი ირაკლი შატაკიშვილი, გარემოს დაცვისა და სოფლის მეურნეობის მინისტრის მოადგილე ლაშა დოლიძე და საკრებულოს დეპუტატები დაესწრნენ.
,,ეს დღე გვაერთიანებს და კიდევ ერთხელ გვახსენებს, რამდენად მნიშვნელოვანია ქვეყნის თავისუფლება, ერთიანობა და იმ ღირებულებების შენარჩუნება, რომლებზეც ჩვენი სახელმწიფო დგას. 26 მაისს მიღებულმა დამოუკიდებლობის აქტმა, კიდევ ერთხელ დაადასტურა ქართველი ხალხის ურყევი ნება ეცხოვრათ თავისუფალ და დემოკრატიულ ქვეყანაში. საქართველო გახდა დამოუკიდებელი სახელმწიფო და სწორედ ამით ჩაეყარა საფუძველი ჩვენს ეროვნულ თვითმყოფადობას და თავისუფალ მომავალს”, - განაცხადა მამუკა რეხვიაშვილმა.
სხვადასხვა სახის თემატური ღონისძიებები დღის ბოლომდე გაგრძელდება. სიმბოლურად 17:10 საათზე, შესრულდება საქართველოს სახელმწიფო ჰიმნი. სადღესასწაულო პროგრამას გალა-კონცერტი დაასრულებს.
იმედი
წყარო: imedinews.ge