მარკ რუტე: ნატო რუსეთის ნებისმიერ „სულელურ ნაბიჯს“ უპასუხებს

ნატოს გენერალურმა მდივანმა მარკ რუტემ განაცხადა, რომ 7-8 ივლისს ანკარაში დაგეგმილ სამიტზე ალიანსის წევრი ქვეყნები სამხედრო მრეწველობის გაძლიერების მიზნით გადასადგმელ ნაბიჯებზე იმსჯელებენ და ათეულობით მილიარდი დოლარის ღირებულების კონტრაქტებს გააფორმებენ. ინფორმაციას Reuters-ი ავრცელებს.

სააგენტოს ცნობით, ვაშინგტონში სიტყვით გამოსვლისას რუტემ აღნიშნა, რომ ნატოს სამიტი თურქეთში იქნება ყველაზე ძლიერი სიგნალი რუსეთის პრეზიდენტის ვლადიმერ პუტინის მისამართით იმის თაობაზე, რომ ალიანსი მზადაა უპასუხოს მის ნებისმიერ „სულელურ ნაბიჯს“.

რუტემ განაცხადა, რომ პუტინს „ვალდებულებების არ ეშინია. მას ეშინია, რომ ჩვენ ამას შევასრულებთ. ზუსტად ამით ვართ დაკავებულები, ვლადიმერ. ჩვენ თავს დავიცავთ“.

ნატოს გენერალურმა მდივანმა აღნიშნა, რომ ალიანსი სამხედრო წარმოების თვალსაზრისით რუსეთს უსწრებს. „ეს არის გზავნილი რუსებისთვის: ვიცით, რომ აკეთებთ, მაგრამ ჩვენ უკეთესად გამოგვდის“, - თქვა რუტემ.