მარკო რუბიო: ეროვნულ სახელმწიფოებს მნიშვნელობა აქვს, ნაციონალიზმი კვლავ რეალობაა, ეროვნული საზღვრები მნიშვნელოვანია, ხოლო ქვეყნები ყოველთვის საკუთარი ინტერესებიდან გამომდინარე იმოქმედებენ

აშშ-ის სახელმწიფო მდივნის მარკო რუბიოს განცხადებით, ეროვნულ სახელმწიფოებს მნიშვნელობა აქვს, ნაციონალიზმი კვლავ რეალობაა, ეროვნული საზღვრები მნიშვნელოვანია, ხოლო ქვეყნები ყოველთვის საკუთარი ინტერესებიდან გამომდინარე იმოქმედებენ.

როგორც რუბიომ თეთრი სახლის მიერ ორგანიზებულ ერთ-ერთ ღონისძიებაზე განაცხადა, აშშ-მა თავის დროზე საშინელი შეცდომა დაუშვა, როცა იფიქრა, რომ წარმოების გადატანა სხვა ქვეყნებში მეტ შემოსავალს მოიტანდა და პროდუქციას გააიაფებდა.

„ვფიქრობ, ჩვენმა ქვეყანამ საშინელი შეცდომა დაუშვა. არცთუ ისე დიდი ხნის წინ, რამდენიმე წლის წინ, მაშინდელ მმართველებს, განსაკუთრებით „ცივი ომის“ ბოლოს ჰქონდათ იდეა, რომ ნივთის წარმოების უნარს მნიშვნელობა აღარ აქვს.

მნიშვნელობა აღარ ჰქონდა, თუ სად იწარმოებოდა საქონელი: ისინი ყველაზე ეფექტიან ადგილას, უმცირესი დანაკარგებით უნდა ეწარმოებინათ. ეს კომპანიებისთვის მეტ შემოსავალს, ხოლო მომხმარებლებისთვის დაბალ ფასებს გულისხმობდა. იქმნებოდა ვარაუდი, რომ მსოფლიომ ასე უნდა იმუშაოს. არსებობდა ილუზია, თითქოს მთელი მსოფლიო თავისუფალ სამრეწველო დემოკრატიად ჩამოყალიბდებოდა და ყველა ჩვენ დაგვემსგავსებოდა.

მაგრამ აღნიშნული იდეა რეალობას შეეჯახა. იმ რეალობას, რომ კაცობრიობის ისტორია ასე არასდროს მუშაობდა: ეროვნულ სახელმწიფოებს მნიშვნელობა აქვს, ნაციონალიზმი კვლავ რეალობაა, ეროვნული საზღვრები მნიშვნელოვანია, ხოლო ქვეყნები ყოველთვის საკუთარი ინტერესებიდან გამომდინარე იმოქმედებენ“, - განაცხადა რუბიომ.