მასწავლებელთა პროფესიული განვითარების ეროვნული ცენტრი პროექტ „მეტი STEAM ჩვენს სკოლაში“ მონაწილე მასწავლებლებისთვის სამუშაო შეხვედრების ციკლს ატარებს

მასწავლებელთა პროფესიული განვითარების ეროვნული ცენტრი პროექტ „მეტი STEAM ჩვენს სკოლაში“ მონაწილე მასწავლებლებისთვის სამუშაო შეხვედრების ციკლს ატარებს, რომლის მიზანია საპროექტო თემატიკის დახვეწა და მონაწილეთა მხარდაჭერა პროექტების განხორციელების პროცესში.

შეხვედრების ციკლი პირისპირ და ონლაინ ფორმატში ხორციელდება და მოიცავს ტრენინგებს, ვებინარებსა და სემინარებს.

პროექტის ფარგლებში მასწავლებელთა პროფესიული განვითარების ეროვნულ ცენტრში აღმოსავლეთ საქართველოს საჯარო სკოლების მასწავლებლებისთვის პირისპირ სამუშაო შეხვედრები მიმდინარეობს. ანალოგიური შეხვედრები დასავლეთ საქართველოს სკოლების წარმომადგენლებისთვის ქუთაისსა და ბათუმშიც გაიმართება. დამატებითი ინფორმაციისთვის შეგიძლიათ მიმართოთ "STEAM სკოლებში" მიმართულების კოორდინატორს ელექტრონულ ფოსტაზე: mnakashidze@tpdc.ge

შეხვედრები მონაწილეებს შესაძლებლობას აძლევს განივითარონ კომპეტენციები მეცნიერების, ტექნოლოგიების, ელექტრონული ინჟინერიისა და STEAM მეცნიერებების მიმართულებით; ასევე, ამ სფეროს გამოცდილი პროფესიონალების ხელშეწყობით გაიღრმაონ თეორიული ცოდნა და დააგროვონ პრაქტიკული გამოცდილება.

მასწავლებელთა პროფესიული განვითარების ეროვნული ცენტრის პროექტში „მეტი STEAM ჩვენს სკოლაში“ საქართველოს სხვადასხვა რეგიონის 430 სკოლის საბუნებისმეტყველო საგნების (ბუნებისმეტყველება, ქიმია, ფიზიკა, ბიოლოგია), კომპიუტერული ტექნოლოგიებისა და STEAM სწავლებით დაინტერესებული 530 მასწავლებელი მონაწილეობს.

ინფორმაციას მასწავლებელთა პროფესიული განვითარების ეროვნული ცენტრი ავრცელებს.