მასწავლებელთა პროფესიული განვითარების ეროვნული ცენტრის დირექტორის მოადგილემ ,,ERASMUS+“ პროექტის ფარგლებში ბარსელონაში გამართულ შეხვედრაში მიიღო მონაწილეობა

მასწავლებელთა პროფესიული განვითარების ეროვნული ცენტრის დირექტორის მოადგილე ნინო ბეგლარაშვილმა, ,,ERASMUS+“ ახალი პროექტის - „სწავლის პერსონალიზაცია“ (UP-UL) - ფარგლებში, ქალაქ ბარსელონაში გამართულ პირველ შეხვედრაში მიიღო მონაწილეობა. ინფორმაციას მასწავლებელთა პროფესიული განვითარების ეროვნული ცენტრი ავრცელებს.

შეხვედრის მონაწილეებმა განიხილეს ისეთი მნიშვნელოვანი საკითხები, როგორებიცაა: სხვადასხვა საჭიროების მქონე მოსწავლეთა მხარდაჭერის ეფექტიანი მიდგომები, შეფასების თანამედროვე პრაქტიკები, მასწავლებლების გაძლიერების და სწავლის მოქნილი გარემოს შექმნის მნიშვნელობა. საუბარი შეეხო ხელოვნური ინტელექტის როლის მნიშვნელობას განათლებაში, მათ შორის უსაფრთხოების, ეთიკური გამოყენების და მონაცემთა დაცვის მიმართულებით. შეხვედრაში მონაწილეობდნენ პროექტის პარტნიორი ევროპის ქვეყნების წარმომადგენლები.

„სწავლის პერსონალიზაცია“ ახალი პროექტია, რომლის მიზანია ხელოვნურ ინტელექტზე დაფუძნებული ინტერაქტიული რუბრიკის, მეთოდოლოგიური გზამკვლევის და ჩატბოტის/აპლიკაციის შექმნის გზით პერსონალიზებული სწავლება და სკოლებზე მისი გავლენის შესწავლა.

პერსონალიზებული სწავლება წარმოადგენს არა მხოლოდ მეთოდს, არამედ განათლების თანამედროვე ხედვას, რომელიც ორიენტირებულია მოსწავლეთა პოტენციალის სრულად გამოვლენაზე, გააზრებულ სწავლებასა და ცხოვრებისეული უნარების განვითარებაზე.

მასწავლებელთა პროფესიული განვითარების ეროვნული ცენტრი პროექტის ფარგლებში მოამზადებს ტრენინგ მოდულს ჩატბოტის/აპლიკაციის სწავლა-სწავლების პროცესში ეფექტიანად გამოყენების შესახებ, რომელიც შეთავაზებული იქნება მასწავლებლებისთვის, როგორც უწყვეტი პროფესიული განვითარების შესაძლებლობა.