მედია: აშშ და ირანი დარტყმების შეწყვეტაზე შეთანხმდნენ

აშშ და ირანი ურთიერთთავდასხმების შეწყვეტასა და ჰორმუზის სრუტეში გემების თავისუფალი გადაადგილების უზრუნველყოფაზე შეთანხმდნენ, - წერენ Axios-ი, The Hill-ი და Reuters-ი წყაროებზე დაყრდნობით.

„ტექნიკური მოლაპარაკებები ურთიერთგაგების მემორანდუმის ყველა პუნქტზე გაგრძელდება. ამ ეტაპზე ორივე მხარე თავს შეიკავებს შემდგომი ქმედებებისგან, ხოლო გემები სრუტეში თავისუფლად გადაადგილებას შეძლებენ“, - განაცხადა The Hill-ის ერთ-ერთმა რესპონდენტმა.

Axios-ის ინფორმაციით, 30 ივნისს მხარეები კატარის დედაქალაქ დოჰაში შეხვედრას გეგმავენ, რათა ჰორმუზის სრუტის საკითხები განიხილონ.

მანამდე, აშშ-მა და ირანმა კვლავ გაცვალეს დარტყმები. აშშ-ის შეიარაღებული ძალების ცენტრალურმა სარდლობამ განაცხადა, რომ სამხედრო ობიექტებზე დარტყმები მას შემდეგ განახორციელა, რაც ირანულმა ძალებმა დამრტყმელი უპილოტო საფრენი აპარატი გამოიყენეს და ჰორმუზის სრუტეში პანამის დროშის ქვეშ მავალ ტანკერს დაარტყეს. ტრამპმა განაცხადა, რომ ირანმა კიდევ ერთხელ დაარღვია შეთანხმება ცეცხლის შეწყვეტის შესახებ. ირანმა, თავის მხრივ, დარტყმები ქუვეითსა და ბაჰრეინში მდებარე ამერიკულ სამხედრო ობიექტებზე მიიტანა.

აშშ-მა და ირანმა ურთიერთგაგების მემორანდუმს 18 ივნისს მოაწერეს ხელი.