მედია: კოპენჰაგენში პროპალესტინური აქციის დარბევა, რომლის დროს 20 დემონსტრანტი დააკავეს, სოციალურ ქსელებში ვირუსულად გავრცელდა

დანიის დედაქალაქ კოპენჰაგენში პროპალესტინური აქციის დარბევა, რომლის დროსაც 20 დემონსტრანტი დააკავეს, სოციალურ ქსელებში ვირუსულად გავრცელდა. ინფორმაციას დანიური მედია ავრცელებს.

პოლიციამ TV2 Kosmopol-სა და დანიის საზოგადოებრივ მაუწყებელს (DR) განუცხადა, რომ მათ მხოლოდ ეპიზოდურად გამოიყენეს ხელკეტები, როცა დემონსტრანტები შეიჭრნენ კერძო საკუთრებაში და არ ემორჩილებოდნენ პოლიციის მითითებებს. საუბარია გადამზიდი გიგანტის Maersk-ის ოფისზე. კოპენჰაგენის პოლიციის უფროსმა ინსპექტორმა პეტერ დალმა აღნიშნა, რომ არსებობს სიტუაციები, როცა ფიზიკური ძალის გამოყენება აუცილებელი ხდება, თუმცა აღნიშნული ყოველთვის გარკვეული შეფასების გაკეთების შემდეგ ხდება.

„ჩვენ ყოველთვის მშვიდობიან გზას ვეძებთ და ვცდილობთ ორგანიზატორებთან დიალოგს“, - განაცხადა ინსპექტორმა. პოლიციელების ქმედებებთან დაკავშირებულ საჩივრებს სპეციალური სააგენტო The Independent Police Complaints Authority (DUP) შეისწავლის.