მერცი: პუტინმა უნდა გადაწყვიტოს, მზად არის თუ არა ზელენსკისთან მოლაპარაკებებისთვის

გერმანიის კანცლერმა, ფრიდრიხ მერცმა განაცხადა, რომ ვლადიმირ პუტინმა უნდა გადაწყვიტოს, დათანხმდება თუ არა უკრაინის პრეზიდენტის, ვოლოდიმირ ზელენსკის მიერ შეთავაზებულ მოლაპარაკებებს.

მერცმა გაიხსენა, რომ ზელენსკიმ კრემლის მეთაურს მოლაპარაკებების გამართვა ჯერ კიდევ ივნისის დასაწყისში შესთავაზა, ამიტომ ახლა მხოლოდ პუტინზეა დამოკიდებული, დათანხმდება თუ არა ამ წინადადებას.

„მინდა კიდევ ერთხელ ძალიან მკაფიოდ განვაცხადო: უკრაინის მხრიდან არსებობს კონკრეტული წინადადება მოლაპარაკებებისთვის შეკრების შესახებ. უკრაინის პრეზიდენტმა 4 ივნისს რუსეთის ლიდერს წერილი მისწერა და მოუწოდა, მზადყოფნა გამოხატოს მოლაპარაკებებისთვის“, - თქვა მან.

კანცლერის თქმით, ზელენსკის ერთადერთი პირობა ის იყო, რომ შეხვედრა მოსკოვში არ გამართულიყო. მერცმა ხაზგასმით აღნიშნა, რომ კრემლის მეთაურმა ეს წინადადება უარყო.

„პუტინმა უარი თქვა ამ შეხვედრაზე და, შესაბამისად, მხოლოდ მასზეა დამოკიდებული გადაწყვეტილება - დათანხმდეს ახლა ამ წინადადებას თუ არა“, - განაცხადა კანცლერმა.