მეცნიერებმა დინოზავრის აქამდე უცნობი სახეობა აღწერეს🦕

ტაილანდელმა და ბრიტანელმა მკვლევრებმა გიგანტური ბალახისმჭამელი დინოზავრის აქამდე უცნობი სახეობა აღწერეს. სტატია მათი ნამუშევრის შესახებ ჟურნალში Scientific Reports გამოქვეყნდა.

დინოზავრის ძვლები პირველად 10 წლის წინ, ტაილანდის ჩაიაფუმის პროვინციაში აღმოაჩინეს - ისინი შემთხვევით ადგილობრივმა მცხოვრებმა იპოვა. არქეოლოგიური გათხრები 2024 წლამდე გრძელდებოდა.

დინოზავრს, რომელიც სამხრეთ-აღმოსავლეთ აზიაში ბინადართაგან ყველაზე დიდი აღმოჩნდა, Nagatitan chaiyaphumensis-ი ეწოდა. სახელი მომდინარეობს სიტყვებისგან „ნაგა“ (მითური გველისმაგვარი არსება აზიურ ფოლკლორში) და „ტიტანი“, ასევე ჩაიაფუმის პროვინციის დასახელებისგან.

იმ ქანების ასაკიდან გამომდინარე, სადაც ძვლები იპოვეს, მეცნიერებმა დაადგინეს, რომ დინოზავრი დაახლოებით 100-120 მილიონი წლის წინ ცხოვრობდა. ის 27 ტონას იწონიდა (დაახლოებით იმდენივეს, რასაც ათი თანამედროვე სპილო), სიგრძეში კი 27 მეტრს აღწევდა.

ნაგატიტანი ზაუროპოდების ოჯახს ეკუთვნოდა - გრძელკისრიან ბალახისმჭამელ დინოზავრებს. ამ ოჯახის სხვა ცნობილი წარმომადგენლები არიან დიპლოდოკები და ბრონტოზავრები.