მოხალისე მეხანძრემ ფონტებლოს ტყეში ხანძრის განზრახ გაჩენა აღიარა

მოხალისე მეხანძრემ პარიზის მახლობლად, ფონტენბლოს ტყის განზრახ დაწვა აღიარა. იქ გაჩენილი ხანძრის ლოკალიზებას უკვე მეოთხე დღეა ვერ ახერხებენ. კაცმა, რომელიც თავდაპირველად პარიზის სამხრეთით, 60 კილომეტრში მდებარე ტყეში ხანძრის ჩაქრობაში დასახმარებლად თავად გამოცხადდა, ხმელი ტოტების ასანთებად სანთებელა და ბენზინი გამოიყენა, - განაცხადა პროკურორმა დიანა ნგომსიკმა. პოლიციამ საქმეზე სულ 6 ეჭვმიტანილი დააკავა. მანამდე ერთ-ერთმა მათგანმა აღიარა, რომ ტყეს ცეცხლი შემთხვევით, სიგარეტის ნამწვის გადაგდებით გაუჩინა.

ხანძარმა ფონტენბლოში ​ უკვე 2000 ჰექტარზე მეტი ტყის ფართობი გაანადგურა. რაიონიდან 1000 ადამიანის ევაკუაცია განხორციელდა. ფონტენბლოს ტყე პარიზელებისთვის დასვენების პოპულარული ადგილია, თუმცა ბევრი დამსვენებელი უგულებელყოფს კემპინგისა და კოცონის დანთების აკრძალვას. ადგილზე მომუშავე მეხანძრეებმა ცეცხლის 2 მსხვილი კერა აღმოაჩინეს, რის შემდეგაც მომხდარის ძირითად ვერსიად ცეცხლის განზრახ გაჩენა დასახელდა.

ცეცხლის გავრცელებას ხელს უწყობს სიცხის ახალი ტალღა, რომელსაც საფრანგეთი ამჟამად განიცდის. ქვეყნის 101 დეპარტამენტიდან 42-ში გვალვის გამო საგანგაშო, უმაღლესი დონის გაფრთხილება მოქმედებს.