მოლდოვის ვიცე-პრემიერი: რუმინეთთან გაერთიანების სცენარი შეიძლება განიხილებოდეს იმ შემთხვევაში, თუ ევროინტეგრაციის პროცესი ჩაიშლება

მოლდოვის ხელისუფლებამ რუმინეთთან გაერთიანების სცენარზე ღიად პირველად ისაუბრა. ვიცე-პრემიერმა ეუჯენ ოსმოჩესკუმ განაცხადა, რომ ეს ვარიანტი შესაძლოა გარკვეულ გარემოებებში იყოს განხილული.

Euractiv-თან ინტერვიუში მოლდოვის ვიცე-პრემიერმა განაცხადა, რომ რუმინეთთან გაერთიანება შეიძლება განიხილებოდეს ქვეყნის განვითარების ალტერნატიულ გზად, თუ 2028 წლის შემდეგ ევროკავშირში გაწევრიანების შესახებ მოლაპარაკებები დაიბლოკება ან მნიშვნელოვნად შენელდება. მან ეს ვარიანტი პირდაპირ შეაფასა, როგორც გეგმა „ბე“.

ამავდროულად, მან ხაზგასმით აღნიშნა, რომ მთავრობის მთავარ პრიორიტეტად კვლავ რჩება 2028 წლის ბოლომდე ევროკავშირთან გაწევრიანების შესახებ შეთანხმების ხელმოწერა და მოლაპარაკებების პროცესის შეუფერხებლად წინ წაწევა.

ოსმოჩესკუმ ხაზგასმით აღნიშნა, რომ მოლდოვას სჭირდება მკაფიო სიგნალი ბრიუსელისგან მოლაპარაკებებში მიღწეულ პროგრესთან დაკავშირებით, რათა შეინარჩუნოს საზოგადოებრივი მხარდაჭერა რეფორმების მიმართ.

ვიცე-პრემიერის თქმით, ნებისმიერი ნაბიჯი, რომელიც მოლდოვას ევროპულ სტრუქტურებთან დააახლოებს, ხელს შეუწყობს რეფორმების განმტკიცებასა და საზოგადოებაში გაურკვევლობის შემცირებას.

ოსმოჩესკუმ ასევე დაადასტურა, რომ რუმინეთთან გაერთიანების სცენარი შეიძლება განიხილებოდეს იმ შემთხვევაში, თუ ევროინტეგრაციის პროცესი ჩაიშლება. მან მიუთითა ქვეყნებს შორის არსებულ მჭიდრო კულტურულ და ისტორიულ კავშირებზე, ისევე როგორც იმ ფაქტზე, რომ მოლდოვის მოსახლეობის მნიშვნელოვანი ნაწილი უკვე ფლობს რუმინეთის მოქალაქეობას.

მისი თქმით, ასეთი ვარიანტი სერიოზულ ფინანსურ და პოლიტიკურ გადაწყვეტილებებს მოითხოვს, თუმცა, მისივე შეფასებით, მასშტაბებით იგი ვერ შეედრება ისეთ ისტორიულ პროცესებს, როგორიც გერმანიის გაერთიანება იყო. ამავდროულად, მან ხაზგასმით აღნიშნა, რომ ეს სცენარები ჯერჯერობით ჰიპოთეტურია, ხოლო მთავრობის პრიორიტეტად კვლავ მოლდოვის ევროკავშირში სრული გაწევრიანება რჩება.