უნგრეთის პრემიერს პირდაპირ ეთერში შეაფურთხეს | პეტერ მადიარი საჩივრის შეტანას არ აპირებს
ოთხშაბათს დილით, ბუდაპეშტის ნიუგატის რკინიგზის სადგურზე, Facebook-ის პირდაპირი ეთერის დროს, ხანდაზმულმა მამაკაცმა უნგრეთის პრემიერ-მინისტრ პეტერ მადიარს შეაფურთხა.
მადიარი ტრანსპორტისა და ინვესტიციების მინისტრ დავიდ ვიტეზისთან ერთად სადგურის ვესტიბიულში მიდიოდა, რათა მათ მთავრობის "ბაროშ გაბორის რკინიგზის განვითარების გეგმა" წარედგინათ.
ამ დროს მათკენ ხანდაზმული მამაკაცი გაემართა, რაღაც ჩაილაპარაკა (სავარაუდოდ, ფრაზა: "აქ მოსვლა როგორ გაბედეთ") და პრემიერის მიმართულებით შეიფურთხა. ვიდეოკადრებში უშუალოდ ეს მომენტი მინისტრ ვიტეზის სხეულმა დაფარა, თუმცა ხმა და პოლიტიკოსების რეაქცია პირდაპირ ეთერში ნათლად დაფიქსირდა.
"ჯანმრთელობას გისურვებთ", - უპასუხა მადიარმა გზის გაგრძელებისას.
მოგვიანებით გამართულ პრესკონფერენციაზე მადიარი კვლავ დაუბრუნდა ამ ინციდენტს. მან მხარდამჭერებს მოუწოდა, არ დაეკარგათ მოტივაცია და აღნიშნა, რომ ადამიანებს, რომლებიც ვერ აკონტროლებენ დაგროვილ ბრაზს, "გაგება და ნუგეში" სჭირდებათ. მან მომხდარში ყოფილი პრემიერ-მინისტრის, ვიქტორ ორბანისა და მისი მთავრობების "სახელმწიფო ბიუჯეტიდან დაფინანსებული მრავალწლიანი პოლიტიკური პროპაგანდა" დაადანაშაულა, რომელმაც, მისი თქმით, უნგრული საზოგადოების ნაწილში სიძულვილი დათესა.
მოგვიანებით მთავრობამ გაავრცელა განცხადება, რომ მადიარი ამ ინციდენტთან დაკავშირებით საჩივრის შეტანას არ აპირებს. პირად Facebook გვერდზე პრემიერმა გაცილებით მკაცრი ტონი გამოიყენა, ვიდრე პრესკონფერენციაზე და თავდამსხმელს "ფიდესის (ორბანის პარტიის) ლამა" უწოდა. თუმცა მან დასძინა, რომ წყენას არ ინახავს და მამაკაცს სთხოვა, შემდეგ ჯერზე თავისი მტრობა "პირისპირ" გამოხატოს.
BM.GE
წყარო: bm.ge