MS Now: თვეების განმავლობაში ვიცე-პრეზიდენტისა და სახელმწიფო მდივნის საპრეზიდენტო კანდიდატურების შეფასების შემდეგ, პრეზიდენტმა ჯეი დი ვენსის ღიად მხარდაჭერა დაიწყო

თვეების განმავლობაში ვიცე-პრეზიდენტისა და სახელმწიფო მდივნის საპრეზიდენტო კანდიდატურების შეფასების შემდეგ, პრეზიდენტმა ჯეი დი ვენსის ღიად მხარდაჭერა დაიწყო, - წერს ამერიკული გამოვემა MS Now ინფორმირებულ წყაროებზე დაყრდნობით.

თვეების განმავლობაში ტრამპი ჯეი დი ვენსსა და მარკო რუბიოს თითქოს მეტოქე კონკურსანტებივით ეპყრობოდა - თანაშემწეებსა თუ დონორებში მათ შესახებ აზრს იკვლევდა და ორივეს სავარაუდო მემკვიდრედ განიხილავდა ისე, რომ საკუთარ არჩევანს არ ამჟღავნებდა.

თუმცა, როგორც 2028 წლის საპრეზიდენტო რბოლაზე ტრამპის კერძო საუბრებში ჩახედული ხუთი წყარო იუწყება, ბოლო კვირებში ეს მიდგომა შეიცვალა.

„განწყობა ასეთია: „ჯეი დი ჩვენი კაცია და მას გვერდით უნდა დავუდგეთ“, - აცხადებს ადმინისტრაციის მაღალჩინოსანი. ის ერთ-ერთია იმ წყაროებიდან, რომლებმაც კერძო საუბრების დეტალებზე ანონიმურობის პირობით ისაუბრეს.

კიდევ ერთი წყაროს თქმით, ტრამპმა ბოლო დროს იმის აღნიშვნაც დაიწყო, რომ მისი ვიცე-პრეზიდენტი შესანიშნავად გამოიყურება. „მსგავს რეპლიკებს ის უკვე ხშირად იმეორებს“, - დასძინა მან.

თავად ის ფაქტიც სადავოა, იდგა თუ არა ტრამპი ოდესმე რეალურად ვენსსა და რუბიოს შორის არჩევანის წინაშე. ორივე პოლიტიკოსის გუნდში ამტკიცებენ, რომ მათ შორის არსებული მეტოქეობა გადაჭარბებულია.