ნანა კაკაბაძე: ვინმე თაზო დათუნაშვილი თურმე პოლიტიკოსი ყოფილა, თანაც „ლელოს“ წევრი, რამდენჯერმე ტელევიზორშიც გამოჩენილა. ეტყობა, ამის შედეგად თავი რაღაცად ჩაუთვლია და ჰგონებია, რომ სხვისი შეურაცხყოფით კიდევ უფრო დიდ „ვინმედ“ წარმოაჩენდა თავს

თაზოსებრთა ანატომიისათვის, - ამ სათაურით არასამთავრობო ორგანიზაცია „მოძრაობა ნეიტრალიტეტის“ დამფუძნებელი ნანა კაკაბაძე სოციალურ ქსელში პოსტს აქვეყნებს.

როგორც ის აღნიშნავს, ყველაზე ამაზრზენი ის არის, რომ თაზო და მისნაირები დემოკრატებისა და მედასავლეთეების როლს ირგებენ და გვასწავლიან, რომ ადამიანის გარეგნობაზე თუ ჯანმრთელობის მდგომარეობაზე აპელირებით სხვისი ბულინგი სწორედ დასავლური ღირებულებაა.

„ვინმე თაზო დათუნაშვილი თურმე პოლიტიკოსი ყოფილა, თანაც „ლელოს“ წევრი, რამდენჯერმე ტელევიზორშიც გამოჩენილა. ეტყობა, ამის შედეგად თავი რაღაცად ჩაუთვლია და ჰგონებია, რომ სხვისი შეურაცხყოფით კიდევ უფრო დიდ „ვინმედ“ წარმოაჩენდა თავს. ამისათვის ერთი დეპუტატი ამოურჩევია, რომელიც რატომღაც დაბალ ღობედ მიუჩნევია და უბრძანებია: „ზეზეული გვამი შარმანაშვილი, თურმე კაცი ყოფილა შარმანაშვილი, კაცი და ქართველი ყოფილა და შეურაცხყოფას ვერ ითმენს თენგიზა შარმანაშვილი“.

მართალია, ამ მდაბიო კაცუნას უკვე საკადრისი პასუხი გასცეს თენგიზ შარმანაშვილის თანაპარტიელებმა, მაგრამ თენგიზთან თითქმის ნახევარსაუკუნოვანი ნაცნობობა და ეროვნულ მოძრაობაში თანამებრძოლობა არ მაძლევს იმის საშუალებას, რომ რამდენიმე სიტყვა არ ვთქვა ამ ადამიანისა და მისი ლანძღვით თავის წარმოჩენის მსურველი თაზოს შესახებ.

როდესაც თაზოსნაირ გოგო-ბიჭებს ვუყურებ, თავი კიტრად რომ მოაქვთ, სულ ვცდილობ წარმოვიდგინო, ესენი რომ 70-80-იანი წლების ჩვენი თაობის წარმომადგენლები ყოფილიყვნენ, ბუჩქებში იქნებოდნენ შემძვრალები თუ პარტიისა და კომკავშირის აქტივისტების გვერდით მასობრივი ეროვნული მოძრაობის ფესვებთან მდგარებს დაგვიპირისპირდებოდნენ?აი, თენგიზ შარმანაშვილმა მაშინ ეროვნულების გვერდით დგომის გზა აირჩია და საკუთარი თავისუფლების თუ ჯანმრთელობის დათმობის რისკის ფასად დაუპირისპირდა კონფორმისტ კომკავშირელებს, რომელთა შორის მაშინ თაზოს დღევანდელი ლიდერი მამუკა ხაზარაძეც იყო.

კარგი, ღმერთმა ისე განსაჯა, რომ თაზო და მისნაირები სხვა დროს დაიბადნენ და ვერ მოვახდენთ მათი მოქმედების სავარაუდო პროეცირებას 80-იან წლებთან, მაგრამ ამ გოგო-ბიჭებმა თავიანთ მშობლებს მაინც ჰკითხონ, შარმანაშვილი და მისნაირები რომ კომუნისტურ რეჟიმს ებრძოდნენ, თქვენ იმ დროს სად იყავით, რას აკეთებდითო? ალბათ ბევრი ასეთის მშობელი ღრმად ამოიოხრებს და უპასუხებს - „მე მომკლეს, შვილო“-ო.

ყველაზე ამაზრზენი ის არის, რომ თაზო და მისნაირები დემოკრატებისა და მედასავლეთეების როლს ირგებენ და გვასწავლიან, რომ ადამიანის გარეგნობაზე თუ ჯანმრთელობის მდგომარეობაზე აპელირებით სხვისი ბულინგი სწორედ დასავლური ღირებულებაა, ხოლო სხვისთვის შეურაცხყოფის მიყენება (თუნდაც მამის ტოლი კაცისთვის „თენგიზას“ დაძახება) - კაცობა. ცალკე აღებულ ალბათ ვინმე თაზოზე ამდენი დროის დახარჯვა სწორი არ იქნებოდა, რომ „თაზოობა“ ზოგადი მოვლენა არ იყოს ჩვენს ყოველდღიურობაში.

არადა, სწორედ თაზოსნაირებზე ამბობდა ჩვენი ერის სულიერი მამა ჯერ კიდევ მე-19 საუკუნეში: „ლანძღვა-გინება უმართებულო საქციელია და მარტო მლანძღველის სიბრიყვეს მოასწავებს. სიბრიყვე კი ავზნეობის ნიშანი კი არ არის, გაუზრდელობის, გაუწურთვნელობის საქმე“, - წერს ნანა კაკაბაძე.