ნავროცკის კანცელარიის ხელმძღვანელი „მიროტვორეცის“ ბაზაში მოხვდა

პოლონეთის პრეზიდენტის, კაროლ ნავროცკის კანცელარიის ხელმძღვანელი ზბიგნევ ბოგუცკი ცენტრ „მიროტვორეცის“ ბაზაში შეიყვანეს. ამის მიზეზი გახდა მისი განცხადებები უკრაინის დასავლეთ ოლქების შესახებ, რომლებსაც მან „აღმოსავლეთ მალოპოლსკა“ უწოდა ვოლინის ტრაგედიასთან დაკავშირებული კომენტარის დროს, ასევე მისი შეფასებები სტეპან ბანდერას პიროვნებასა და უკრაინის აჯანყებულთა არმიაზე.

„მიროტვორეცის“ საიტზე აღნიშნულია, რომ პოლონელი ჩინოვნიკის ქმედებები ფასდება როგორც „უკრაინის სუვერენიტეტსა და ტერიტორიული მთლიანობის ხელყოფა“, „უკრაინის წინააღმდეგ ჰუმანიტარული აგრესიის აქტებში მონაწილეობა“ და „საზოგადოებრივად მნიშვნელოვანი ინფორმაციით მანიპულირება უკრაინელების მიმართ პოლონელების სიძულვილის გაღვივების მიზნით“. გარდა ამისა, მას „ანტიუკრაინული პროპაგანდისტი“ უწოდეს.

სკანდალი ბოგუცკის ინტერვიუს შემდეგ ატყდა, რომელიც პოლონურმა სააგენტომ PAP გაავრცელა. ვოლინის ტრაგედიის თემისა და სტეპან ბანდერასადმი დამოკიდებულების კომენტირებისას, ჩინოვნიკმა განაცხადა, რომ პოლონეთის ხელისუფლებისა და საზოგადოების მნიშვნელოვანი ნაწილის აზრით, „ბანდერასა და მისი მიმდევრების განდიდება“ არ შეესაბამება ევროპულ და ტრანსატლანტიკურ ფასეულობებს.

ტერმინი „აღმოსავლეთ მალოპოლსკა“ პოლონეთში 1918-1939 წლებში გამოიყენებოდა, როდესაც თანამედროვე ლვოვის, ტერნოპოლისა და ივანო-ფრანკოვსკის ოლქები პოლონეთის რესპუბლიკის შემადგენლობაში შედიოდა. უკრაინაში ეს განსაზღვრება ისტორიულად და პოლიტიკურად სენსიტიურად ითვლება, რადგან ამ ტერიტორიებზე პოლონურ ბატონობასთან ასოცირდება.

„მიროტვორეცი“ უკრაინული არასამთავრობო ვებგვერდი და ღია მონაცემთა ბაზაა, რომელიც 2014 წელს შეიქმნა. მისი ოფიციალური მიზანია იმ პირთა იდენტიფიცირება და აღრიცხვა, რომელთა ქმედებებიც, საიტის ავტორთა აზრით, საფრთხეს უქმნის უკრაინის ეროვნულ უსაფრთხოებას, სუვერენიტეტსა და ტერიტორიულ მთლიანობას.