ნეპალის საგარეო უწყება: ნეპალს არ სჭირდება უცხოური დახმარება სამაშველო-საძიებო ოპერაციებისთვის
ნეპალს არ სჭირდება უცხოური დახმარება სამაშველო-საძიებო ოპერაციებისთვის, - განაცხადა ქვეყნის საგარეო საქმეთა სამინისტრომ, მიუხედავად იმ ქვეყნების შეთავაზებებისა, რომელთა მოქალაქეებიც დაკარგულად ითვლებიან.
ასობით უცხოელი მოქალაქე კვლავ დაკარგულად ითვლება, მათ შორის სამხრეთ კორეიდან. სეულში აცხადებენ, რომ ნეპალში უკვე გააგზავნეს სწრაფი რეაგირების ჯგუფი და ასევე გეგმავენ კატასტროფების მართვის სამაშველო ჯგუფის გაგზავნასაც.
თუმცა, ნეპალის საგარეო უწყებამ პარასკევს აღნიშნა, რომ სამაშველო სამუშაოებს დამოუკიდებლად უძღვება.
„დახმარების შეთავაზება ბუნებრივია. საძიებო-სამაშველო ოპერაციას ჩვენი უსაფრთხოების სამსახურები ატარებენ. ამ ეტაპზე ჩვენ მსგავსი დახმარება არ გვჭირდება“, - განაცხადა პარასკევს საგარეო საქმეთა სამინისტროს სპიკერმა, ლოკ ბაჰადურ ჩეთრიმ.
The Kathmandu Post-ის ცნობით, ინდოეთმა, ჩინეთმა, შეერთებულმა შტატებმა, დიდმა ბრიტანეთმა, იაპონიამ, სამხრეთ კორეამ, შრი-ლანკამ და ბანგლადეშმა მთავრობას სთხოვეს, ნება დაერთო მათი სამაშველო ჯგუფებისთვის, ჩართულიყვნენ ოპერაციაში.
იმედი
წყარო: imedinews.ge