The Telegraph: ტრამპის ადმინისტრაცია ვენესუელის უზარმაზარ ნავთობსაბადოებში მთავარი ინვესტორის სტატუსის მოსაპოვებლად მსხვილი გარიგების დადებას უახლოვდება

ტრამპის ადმინისტრაცია ვენესუელის უზარმაზარ ნავთობსაბადოებში მთავარი ინვესტორის სტატუსის მოსაპოვებლად მსხვილი გარიგების დადებას უახლოვდება, - წერს ბრიტანული გამოცემა The Telegraph-ი.

აღნიშნულ მოლაპარაკებებს სტრატეგიული მნიშვნელობა აქვს ამერიკის ენერგოუსაფრთხოების უზრუნველყოფისთვის, განსაკუთრებით ახლა, როდესაც თეირანთან ხანგრძლივმა სამხედრო დაპირისპირებამ გლობალურ ბაზრებზე საწვავის მიწოდების სერიოზული შეფერხებები გამოიწვია.

The Wall Street Journal-ის ინფორმაციით, თეთრი სახლი ვენესუელის ხელისუფლებასთან მოლაპარაკებებს აწარმოებს, რათა ქვეყნის 17 ყველაზე პერსპექტიულ ნავთობისა და გაზის საბადოში წილები მოიპოვოს.

აღნიშნულ საბადოებში არსებული 90 მილიარდი ბარელის ოდენობის დადასტურებული მარაგები შეერთებულ შტატებს საკუთარი ენერგორესურსების გაორმაგების შესაძლებლობას მისცემს.

შედარებისთვის, ოფიციალური კარაკასის მონაცემებით, ვენესუელა 300 მილიარდ ბარელ დადასტურებულ ნავთობს ფლობს, რაც მსოფლიოში უდიდესი საბადოების მაჩვენებელია.

აშშ-ის მაღალჩინოსანმა Axios-თან საუბარში აღნიშნა: „ამ შეთანხმებისთვის დიდი გარიგების წოდება მის რეალურ მასშტაბებს ვერ ასახავს. ეს ჭეშმარიტად გრანდიოზული შეთანხმებაა“.

სხვა მაღალჩინოსნის შეფასებით: „პრეზიდენტი ტრამპი ახლოსაა იმ შეთანხმებასთან, რომელიც ამერიკის ენერგოუსაფრთხოებას ათწლეულების განმავლობაში უზრუნველყოფს, თანაც არა მხოლოდ შეერთებულ შტატებში, არამედ მთელ დასავლეთ ნახევარსფეროში“.

მოსალოდნელია, რომ ეს შეთანხმება გზას გაუხსნის ამერიკული კორპორაციებისა და კონტრაქტორების დაბრუნებას, რომლებიც საბადოების მართვას ჩაიბარებენ.