ნეთანიაჰუ: თურქეთი არ არის შეერთებული შტატების სამაგალითო მოკავშირე

რამდენიმე საათის შემდეგ მას შემდეგ, რაც აშშ-ის პრეზიდენტმა, დონალდ ტრამპმა განაცხადა, რომ განიხილავს თურქეთისთვის F-35 ტიპის გამანადგურებლების მიყიდვის შესაძლებლობას, ისრაელის პრემიერ-მინისტრმა, ბენიამინ ნეთანიაჰუმ ამ პოტენციური ნაბიჯის წინააღმდეგ გაილაშქრა.

CNN-თან ინტერვიუში ნეთანიაჰუმ გააფრთხილა, რომ ამერიკის ყველაზე მოწინავე ავიაგამანადგურებლების მიყიდვა „თურქეთს შეერთებული შტატების მეგობარ სახელმწიფოდ არ აქცევს“.

თურქეთის პრეზიდენტ რეჯეფ თაიფ ერდოღანთან გამწვავებული დავის ფონზე, ნეთანიაჰუმ ანკარა დაახასიათა, როგორც „რეჟიმი, რომელიც ინფიცირებულია „მუსლიმთა საძმოს“ იდეოლოგიით, რომელიც სძულს შეერთებული შტატები“.

„ის არ არის შეერთებული შტატების სამაგალითო მოკავშირე“, - განუცხადა ნეთანიაჰუმ CNN-ის ჟურნალისტს, დანა ბაშს. „ის იმუქრება ჩემი ქვეყნის, ერთადერთი ებრაული სახელმწიფოს განადგურებით“.