ოჯახის სიწმინდის დღესთან დაკავშირებით, მსვლელობა ბათუმში, ღვთისმშობლის შობის საკათედრო ტაძრიდან 12:00 საათზე დაიწყება

ოჯახის სიწმინდის დღეს ლოცვა და მსვლელობა ქვეყნის ყველა ქალაქში გაიმართება. ბათუმში, ღონისძიება 12:00 საათზე დაიწყება.

მანამდე მრევლს ღვთისმშობლის შობის საკათედრო ტაძარში ელოდებიან. მსვლელობა ბათუმის განმათავისუფლებელ მეომართა საფლავთან დასრულდება, სადაც პარაკლისს გადაიხდის. ეპარქია ღონისძიებაში მონაწილეობის მისაღებად ყველა მოქალაქეს იწვევს.

„პავლე მოციქული ბრძანებს, ოჯახი მცირე ეკლესიაა. როდესაც ოჯახი მტკიცეა და ძლიერი, ერიც, ქვეყანაც ძლიერია. ამიტომ, მნიშვნელოვანია ამ დღის დაწესება. აწ გარდაცვლილმა, ჩვენმა სიყვარულის პატრიარქმა დააწესა ოჯახის სიწმინდის დღე და ამით ერთიანდება მთელი ერი და ამიტომ, მსვლელობასთან ერთად გვაქვს სავედრებელი ლოცვა. ვლოცავთ ოჯახებს, საქართველოს რომ გამრავლდეს ჩვენი მომავალი, გაძლიერდეს და განმტკიცდეს ოჯახები“, - განაცხადა დეკანოზმა მატათამ (ზოიძე).

17 მაისს ოჯახის სიწმინდისა და მშობლების პატივისცემის დღის აღსანიშნავად 10:00 საათზე საყოველთაო შეკრება საქართველოს 10 ქალაქში დაიწყება.

17 მაისს, ოჯახის სიწმინდის დღესთან დაკავშირებით, ქაშუეთის ტაძრიდან სამების ტაძრამდე მსვლელობა გაიმართება.