ოპოზიციური მედიის მორიგი „ფეიკი”: რატომ გააყალბეს „ტაბულამ” და „ფორმულამ” მდინარაძის განცხადება და რა მიზნით შეცვალეს მის მიერ ნათქვამი სიტყვები, სიტყვით „ნებისმიერი” - რა თქვა სინამდვილეში მამუკა მდინარაძემ?

“ტაბულას” და “ფორმულას” მორიგი “ფეიკი”: ოპოზიციური მედია, ამჯერად ვიცე-პრემიერის და სახელმწიფო მინისტრის, მამუკა მდინარაძის განცხადებას აყალბებს.

“იმედზე” გამართულ დებატებში, მდინარაძემ, “ქართული ოცნების” საპატიო თავმჯდომარის ბიძინა ივანიშვილის შესახებ განაცხადა: “პრაქტიკულად ნახევარი მსოფლიოს მიერ დასანქცირებულია, ორი მილიარდი გაუჩერეს, ფიზიკურ განადგურებას კი არა, ყველანაირ განადგურებას შეეცდებიან ყოველთვის. იცით, რომ მოწყვლადია ყველა ადამიანი, რომელიც საკუთარი სახელმწიფოს დამოუკიდებლობის გარანტი შეიძლება იყოს რაღაცა ფორმით. ბიძინა ივანიშვილის დონის კი არა, ელემენტარული ერთი აგურის დამდებიც საკუთარი სამშობლოს დამოუკიდებლობის საქმეში, შეიძლება იყოს მოწყვლადი, რომ შეიძლება ვიღაცამ გააგოროს, უკაცრავად ამ გამოთქმისთვის.”

ოპოზიციურმა მედიასაშუალებებმა კი, აღნიშნული ციტატა დაამახინჯეს, სიტყვა “ნებისმიერი” ჩაამატეს და შემდეგნაირად გაავრცელეს: “ივანიშვილის დონის კი არა, ნებისმიერი შეიძლება ვიღაცამ გააგოროს, უკაცრავად ამ გამოთქმისთვის”.

გაყალბებული ციტატა ოპოზიციური ფლანგისთვის “ფეიკ” კამპანიის აგორების და ქილიკის მიზეზი გახდა.