ორმა ალპინისტმა ევერესტზე ასვლის ახალი მსოფლიო რეკორდები დაამყარა

ნეპალელმა ალპინისტმა კამი რიტა შერპამ ევერესტი 32-ედ დაიპყრო და პლანეტის უმაღლეს მწვერვალზე ასვლის საკუთარი მსოფლიო რეკორდი განაახლა. იმავე დღეს, ლჰაკპა შერპამ ქალთა შორის ახალი რეკორდი დაამყარა - ის ევერესტზე მეთერთმეტედ ავიდა.

55 წლის კამი რიტა შერპამ მორიგი ასვლა კვირას განახორციელა. ადგილობრივი მედია აღნიშნავს, რომ მწვერვალის დაპყრობამდე ალპინისტი სოციალურ ქსელებში ევერესტზე კარიერის შესაძლო დასრულებაზე მიანიშნებდა. თუმცა, ორგანიზატორი კომპანიის წარმომადგენელმა განაცხადა, რომ საბაზო ბანაკში დაბრუნების შემდეგ სპორტსმენი თავად მიიღებს გადაწყვეტილებას პოტენციური 33-ე ასვლის შესახებ.

კამი რიტა შერპა ნეპალის ერთ-ერთ ყველაზე ცნობილ მაღალმთიან გიდად ითვლება. ის რეგულარულად მონაწილეობს ევერესტზე მოწყობილ კომერციულ ექსპედიციებში და მწვერვალზე ასვლის რაოდენობით მსოფლიო რეკორდს ფლობს.

ქალთა შორის ახალი რეკორდი 53 წლის ლჰაკპა შერპამ დაამყარა. ის ევერესტზე მეთერთმეტედ ავიდა. ალპინისტმა მწვერვალი პირველად 2000 წელს დაიპყრო - პირველი ქალიშვილის შეძენიდან 8 თვის შემდეგ, როდესაც ის მეორე ბავშვზე იყო ორსულად.