ოზურგეთის მუნიციპალიტეტში მოსულმა უხვმა ნალექმა მდინარეების ადიდება გამოიწვია - ძლიერმა ქარმა ელექტროენერგიის გადამცემი ხაზები დააზიანა

ოზურგეთის მუნიციპალიტეტში მოსულმა უხვმა ნალექმა მდინარეების ადიდება გამოიწვია, ხოლო ძლიერმა ქარმა ელექტროენერგიის გადამცემი ხაზები დააზიანა. გურიის მხარეში სახელმწიფო რწმუნებულის ცნობით, სტიქიის ზონაში მუნიციპალიტეტის ყველა შესაბამისი სამსახური მობილიზებულია, ისინი საგანგებო რეჟიმში მუშაობენ. მიმდინარეობს გაწმენდითი სამუშაოები, აღდგენილია ელექტროენერგიის მიწოდება უმეტესი აბონენტისთვის. გაწმენდილია საავტომობილო გზები და აღდგენილია მიმოსვლა.

უახლოეს პერიოდში მუნიციპალური სამსახურები შეუდგებიან ზარალის აღწერას და დათვლას.

„ყველა მუნიციპალური სამსახური მზადყოფნაში იყო, ჩაატარეს გაწმენდითი სამუშაოები. ენერგომომარაგებასთან დაკავშირებით მოსახლეობის ნაწილს პრობლემა შეექმნა და „ენერგო პროს“ ჯგუფებმა ძირითადად უკვე აღადგინეს ელექტროენერგიის მიწოდება. ძლიერი ქარის შედეგად მოითხარა რამდენიმე ხე და ჩაიხერგა საავტომობილო გზები, თუმცა სამაშველო და მუნიციპალურმა სამსახურებმა გზები გაწმინდეს. ამ დროისთვის საავტომობილო მიმოსვლა აღდგენილია“, - განაცხადა გურიის მხარეში სახელმწიფო რწმუნებულმა გიორგი ღურჯუმელიძემ.