პაპუაშვილი: „ლელო“ საქართველოს ბიუჯეტიდან ფულის მიკუთვნების მიზნით დაარსდა და მათგან არც ქსენოფობია გვიკვირს და არც ტერორიზმის მხარდაჭერა

თაღლითი ხაზარაძის პარტია რომ იქნები, რომელიც დაარსდა საქართველოს ბიუჯეტიდან ფულის მიკუთვნების მიზნით, მათგან არც ქსენოფობია გვიკვირს და არც ტერორიზმის მხარდაჭერა, - განაცხადა პარლამენტის თავმჯდომარემ, შალვა პაპუაშვილმა.

მისი თქმით, „ალდემ“, რომელიც ამ პარტიას ზურგს უმაგრებს, პასუხი უნდა გასცეს კითხვას - უჭერს თუ არა მხარს ქსენოფობიას.

„რაც შეეხება ამ ე.წ. არაბიზაციის სლოგანს - ეს არის სრული სიცრუე, რაც დადასტურდა. პროექტები დაიწყო, გაყიდვები დაიწყო, ნახეთ, რომ მათ შორის ქართველები ყიდულობენ ფართებს და ბინებს. სრული აბსურდის მტკიცებას იწყებენ ქსენოფობიის ლოზუნგით. თაღლითი ხაზარაძის პარტია რომ იქნები, რომელიც დაარსდა საქართველოს ბიუჯეტიდან ფულის მიკუთვნების მიზნით, მათგან არც ქსენოფობია გვიკვირს და არც ტერორიზმის მხარდაჭერა. საქმე ისაა, რომ ამ თაღლითების უკან დგას „ალდე“, რომელიც ევროპული გაერთიანებაა და რომელიც უმაგრებს ზურგს სასამართლოს მიერ დამნაშავედ ცნობილ თაღლითებს. ზურგი გაუმაგრეს ტერორიზმის მხარდამჭერ პარტიას. ახლა სადამდე მიდიან, ქსენოფობიასაც მხარს უჭერენ? ან „ალდე“ გაემიჯნება ქსენოფობიას, რომლის წინააღმდეგ ბრძოლაც აქვთ თავად დაანონსებული, ან ქართველი ხალხი საკუთარ დასკვნას გამოიტანს „ალდე“-სთან დაკავშირებით როგორც თაღლითების, ტერორისტების და ქსენოფობების მხარდამჭერ ალიანსზე“, - აღნიშნა პაპუაშვილმა.

პარლამენტის თავმჯდომარემ აღნიშნულ საკითხზე გუშინ ვრცელი პოსტი გამოაქვეყნა.