პარტიის ინფორმაციით, ელენე ხოშტარიას ექიმი პენიტენციური სამსახურის დირექტორს ხვდება

„კოალიცია ცვლილებისთვის“ ერთ- ერთი ლიდერის, ელენე ხოშტარიას მკურნალი ექიმი, რევმატოლოგი მაკა იოსელიანი და ექიმი, “კოალიცია ცვლილებისთვის” წევრი, ანი ქავთარაძე პენიტენციური სამსახურის დირექტორს გიორგი პატარიძეს ხვდებიან. ინფორმაციას პარტიის პრესსამსახური ავრცელებს.

სპეციალური პენიტენციური სამსახურის გენერალური დირექტორი გიორგი პატარიძე ელენე ხოშტარიას თემას დღეს კიდევ ერთხელ გამოეხმაურა. მისი თქმით, პარასკევს ელენე ხოშტარიასთან ექიმის ვიზიტის შემდეგ შეთავაზებული იქნა მსჯავრდებულის პირადი ექიმის და სპეციალური პენიტენციური სამსახურის ხელმძღვანელთან შეხვედრა, თუმცა ეს შეხვედრა ორშაბათამდე მსჯავრდებულის ექიმის მაკა იოსელიანის სურვილით გადაიდო. მან კიდევ ერთხელ მიმართა მაკა იოსელიანს, რომ მზად არის, ნებისმიერ დღეს, ნებისმიერ დროს, შეხვდეს მას და გაცვალონ პოზიციები.