პელეს 1958 წლის მსოფლიო ჩემპიონატის მაისური აუქციონზე გაიყიდება

აუქციონის სახლი Sotheby's გასაყიდად გამოიტანს პელეს მაისურს, რომლითაც ფეხბურთის ლეგენდა 1958 წლის მსოფლიო ჩემპიონატის ფინალში თამაშობდა. ლოტის თავდაპირველი ღირებულება 6 მილიონ დოლარს აღემატება. ვაჭრობა 29 ივნისს გაიხსნებ და 16 ივლისს, მსოფლიო ჩემპიონატის ფინალამდე 3 დღით ადრე დასრულდება.

მაისური პელეს კოლექციიდან აუქციონზე ოდესმე გაყიდული ყველაზე ძვირადღირებული ნივთი უნდა გახდეს. მას ასევე შეუძლია მოხსნას ყველაზე ძვირადღირებული საფეხბურთო მაისურის რეკორდი, რომელიც დიეგო მარადონას ეკუთვნის - მისი მაისური 2022 წელს 9,28 მილიონ დოლარად გაიყიდა.

1958 წელს პელე 17 წლის იყო. მან 2 გოლი გაუტანა შვედეთს და დღემდე რჩება ყველაზე ახალგაზრდა მოთამაშედ, ვისაც კი ოდესმე უთამაშია და გოლი გაუტანია მსოფლიო ჩემპიონატის ფინალში. ბრაზილიამ ის მატჩი ანგარიშით 5:2 მოიგო. თამაშის შემდეგ სპორტსმენმა თავისი მაისური თანაგუნდელს აჩუქა.

მაისური ფეხბურთელის ოჯახში რჩებოდა 1993 წლამდე, შემდეგ კი ედვალდო ალვეს სანტა-როზას სახელობის სპორტის მუზეუმის კოლექციას გადასცეს. დაწესებულებამ 2011 წელს მაისური აუქციონზე გაიტანა და ის უცნობმა პირმა 105 ათას დოლარად შეიძინა. ახლა მან ამ ნივთის გაყიდვა გადაწყვიტა.

პელე ერთადერთი ფეხბურთელია ისტორიაში, რომელიც მსოფლიო ჩემპიონი სამჯერ გახდა - 1958, 1962, 1970 წლებში. მან სპორტიდან წასვლის შესახებ 1977 წლის შემოდგომაზე გამოაცხადა, რის შემდეგაც ბრაზილიის სპორტის მინისტრი და გაეროს ელჩი იყო ეკოლოგიის საკითხებში.

ლეგენდარული ფეხბურთელი 2022 წელს, მძიმე და ხანგრძლივი ავადმყოფობის შედეგად გარდაიცვალა.