პეტრე მამრაძე: ცნობილი სიტყვებია, ევროკავშირი გეოპოლიტიკური ჯუჯაა, მაგრამ ეკონომიკური გიგანტია. აი, გიგანტი დაბერდა, 2008 წლის შემდეგ კი სტაგნაციას ვერ აჩერებენ, სამაგიეროდ შეუძლიათ, მიიღონ კიდევ ერთი რეგულაცია, მაგალითად წყლის ბოთლებთან დაკავშირებით

ცნობილი სიტყვებია, ევროკავშირი „გეოპოლიტიკური ჯუჯაა“, მაგრამ ეკონომიკური გიგანტია. აი, გიგანტი დაბერდა, 2008 წლის შემდეგ კი სტაგნაციას ვერ აჩერებენ, სამაგიეროდ შეუძლიათ, მიიღონ კიდევ ერთი რეგულაცია, მაგალითად წყლის ბოთლებთან დაკავშირებით, - განაცხადა გადაცემაში „EURO ანატომია“ „ერთიანი ნეიტრალური საქართველოს“ წევრმა პეტრე მამრაძემ.

მან ევროკავშირში დემოკრატიის დეფიციტზე ისაუბრა. კერძოდ, გახდა თუ არა ბრიუსელის ძალაუფლება იმდენად უკონტროლო, რომ წევრი სახელმწიფოების სუვერენიტეტი და ამომრჩევლის ნება უკვე მეორე ხარისხოვნანია.

მისივე თქმით, თავის დროზე ბრიტანეთის გასვლა ევროკავშირიდან ამ მიზეზითა განპირობებული. მამრაძეს მიაჩნია, რომ ამით ბრიტანეთი ევროკავშირის ქვეყნების ბედს ნაწილობრივ გაექცა, რადგან ქვეყანაში უკანონო მიგრაციაა და ეს ბრიტანეთს დიდ პრობლემას უქმნის. პეტრე მამრაძემ აღნიშნა, რომ ამის დასტურია ზოგიერთი მუნიციპალიტეტი ბრიტანეთში, სადაც მოსახლეობის უმეტესობა სხვა კულტურისა და რელიგიის ადამიანები არიან.

მამრაძის განცხადებით, ევროპის პოლიტიკურ ელიტაში იგი ვერ ხედავს მზაობას, რომ შეცდომები აღიარონ.

„საქმეც ისაა, რომ არ არის პოლიტიკური ნება, გამოვიდნენ და თქვან, რომ ამ წლებში იყო დაშვებული შეცდომები და ახლა ვიმკით ამას. გამოჩენილ ფინანსისტს, ევროპის ცენტრალური ბანკის ყოფილ პრეზიდენტს, მარიო დრაგის, რომელიც მანამდე ასევე იტალიის წარმატებული პრემიერი იყო, სთხოვეს და 2024 წელს ევროკავშირზე შესანიშნავი ანგარიში წარმოადგინა. იქ პუნქტებია, რა უნდა გაკეთდეს - რომ უნდა აღდგეს თავისუფალი კონკურენცია, შეწყდეს სტაგნაცია; რეგულაციები შემცირდეს; სოციალური შემწეობები, რომელიც ეკონომიკას კლავს და საშუალებას არ აძლევს, ესეც უნდა შეწყდეს და მინიმუმ, 800 მლრდ ევრო ყოველწლიურად უნდა იყოს ინვესტიცია ტექნოლოგიის განვითარებაში და ასე შემდეგ“, - აღნიშნა მამრაძემ.

მისივე თქმით, არ არის პოლიტიკური ნება და ევრობიუროკრატები თავის ფუნქციებს არ თმობენ, შესაბამისად, არის სტაგნაციაც.

„საუბედუროდ, ასეთი მანკიერი წრე შეიკრა. ცნობილი სიტყვებია, ევროკავშირი გეოპოლიტიკური ჯუჯაა, მაგრამ ეკონომიკური გიგანტია. აი, გიგანტი დაბერდა, 2008 წლის შემდეგ კი სტაგნაციას ვერ აჩერებენ, სამაგიეროდ შეუძლიათ, მიიღონ კიდევ ერთი რეგულაცია, მაგალითად, წყლის ბოთლებთან დაკავშირებით, ან რაიმე მსგავსი, მაგრამ გარღვევა და პრობლემების აღიარება არ ხდება“, - განაცხადა მამრაძემ.