ფინეთის პრეზიდენტი: სამხედრო ესკალაციის ფართომასშტაბურ ფაზაში გადაყვანა არც რუსეთის ინტერესებშია და არც მის შესაძლებლობებში - ისინი დაშინების მცდელობებს გააგრძელებენ, ჩვენ კი ცივი გონება, სიმშვიდე და თავშეკავება უნდა შევინარჩუნოთ

მიუხედავად იმისა, რომ ფინეთის პრეზიდენტი, ალექსანდრ სტუბი აღიარებს ევროპის საჭიროებას, მოემზადოს რუსეთის მხრიდან „ჰიბრიდული და დივერსიული თავდასხმების გაგრძელებისთვის“, იგი აცხადებს, რომ ევროპამ „ზედმეტი რეაგირება“ არ უნდა მოახდინოს.

„ჩვენ ძალიან ფრთხილად უნდა ვიყოთ და გავიაზროთ, რომ რუსეთი ევროპის დესტაბილიზაციასა და დაშინებას ცდილობს. ყოველ ჯერზე, როდესაც ჰიბრიდულ თავდასხმაზე მწვავე რეაქცია გვაქვს, ისინი, ფაქტობრივად, იმ კონკრეტულ ბრძოლაში იმარჯვებენ“, - განუცხადა სტუბმა POLITICO-ს.

„ასევე უნდა გვესმოდეს, რომ სამხედრო ესკალაციის ფართომასშტაბურ ფაზაში გადაყვანა არც რუსეთის ინტერესებშია და არც მის შესაძლებლობებში“, - დასძინა სტუბმა. „ასე რომ, ისინი დაშინების მცდელობებს გააგრძელებენ, ჩვენ კი, როგორც ვამბობ, ამ სიტუაციაში უბრალოდ ცივი გონება, სიმშვიდე და თავშეკავება უნდა შევინარჩუნოთ“.

სტუბმა ყურადღება გაამახვილა ზოგიერთი სადაზვერვო სამსახურის „მწვავე რეაქციაზე“, რომლებიც „არსებითად ამბობენ, რომ შემდეგი სამიზნე თქვენ ხართ“ რუსეთის შეჭრისთვის.

„ჩვენ ამის მტკიცებულებებს ვერ ვხედავთ“, - განაცხადა მან და დასძინა: „მიგვაჩნია, რომ ფხიზლად და ყურადღებით უნდა ვიყოთ. თუმცა, როგორც იცით, ნატოს წევრებს შორის რუსეთთან ყველაზე გრძელი საზღვარი სწორედ ჩვენ გვაქვს - მთელი საზღვრის ნახევარი. ჩვენი დაზვერვის მონაცემებით, გარკვეული აქტივობა შეინიშნება, თუმცა ამ ეტაპზე პირდაპირი სამხედრო საფრთხე არ არსებობს“.