პიტ ჰეგსეტმა ნატოს „ქაღალდის ვეფხვი“ უწოდა

აშშ-ის თავდაცვის მდივანმა, პიტ ჰეგსეტმა ნატოს მოკავშირეები მწვავედ გააკრიტიკა. მან განაცხადა, რომ ევროპაში ამერიკული კონტინგენტის განლაგების საკითხს მომავალი 6 თვის განმავლობაში ხელახლა შეისწავლიან, თავად ალიანსს კი „ქაღალდის ვეფხვი“ უწოდა.

ბრიუსელში, ნატოს შტაბ-ბინაში სიტყვით გამოსვლისას, ჰეგსეტმა თავდაცვის მინისტრებს უთხრა, რომ ეს გეგმა ალიანსს „სწრაფად და შეუქცევადად წაიყვანს იქით, რომ წამყვანი როლი ევროპამ აიღოს“. მას არ უხსენებია, შემცირდება თუ არა ამის გამო ამერიკული სამხედრო კონტინგენტი ევროპაში, თუმცა აღნიშნა, რომ მოკავშირეები „უფრო მეტად უნდა გააქტიურდნენ“.

„პრეზიდენტი ტრამპი ამ საკითხზე მრავალი წელია და უკვე ორი ადმინისტრაციის განმავლობაში აბსოლუტურად მკაფიო პოზიციას აფიქსირებს“, - განაცხადა ჰეგსეტმა. „ზედმეტად დიდი ხნის განმავლობაში ნატო მხოლოდ „ქაღალდის ვეფხვი“ და ცალმხრივი მოძრაობის ქუჩა იყო. ეს ასე აღარ გაგრძელდება“.

მან მოუწოდა ალიანსს, ტრანსფორმირდეს „ნატო 3.0-ად, რომელიც დაეფუძნება ცივ ომში გამარჯვებულ ნატო 1.0-ის მოდელს“. ჰეგსეტმა დასძინა, რომ ალიანსის დამფუძნებლები, მათ შორის ყოფილი პრეზიდენტი ეიზენჰაუერი, „ყოველთვის მოელოდნენ“, რომ წამყვან როლს ევროპა აიღებდა საკუთარ თავზე. მისივე მტკიცებით, „ნატო 2.0-ის“ პერიოდში ორგანიზაციამ გეზი იცვალა და ყურადღება ისეთ თემებზე გადაიტანა, როგორიცაა „გენდერული თანასწორობა, კლიმატის ცვლილებები და თავდაცვის ხარჯების მკაცრი ეკონომია“.

ჰეგსეტის განცხადებით, ნატოში აშშ-ის შენატანების მოცულობა დამოკიდებული იქნება იმაზე, შეასრულებენ თუ არა ალიანსის სხვა წევრი ქვეყნები თავდაცვის ხარჯებთან დაკავშირებულ საკუთარ ვალდებულებებს. იმ შემთხვევაში, თუ მოკავშირეები „ხარჯების გაზრდას არ იჩქარებენ“, აშშ საკუთარ კონტრიბუციას შეამცირებს.