POLITICO: აშშ აჭიანურებს პრეზიდენტ ემანუელ მაკრონის მიერ ვაშინგტონში საფრანგეთის ელჩის კანდიდატურის დამტკიცებას

სამი ინფორმირებული წყაროს ცნობით, გაეროში ადამიანის უფლებებთან დაკავშირებით წამოჭრილი უთანხმოების ფონზე, აშშ აჭიანურებს პრეზიდენტ ემანუელ მაკრონის მიერ ვაშინგტონში საფრანგეთის ელჩის კანდიდატურის დამტკიცებას, - წერს გამოცემა POLITICO.

მიუხედავად იმისა, რომ ივნისში საფრანგეთში ვიზიტისას მაკრონმა შესაძლოა მოხიბლა აშშ-ის პრეზიდენტი დონალდ ტრამპი თავაზიანობითა და ვერსალის სასახლეში გამართული დახვეწილი ვახშმით, ახალი ელჩის დამტკიცების გაჭიანურება აშკარას ხდის, რომ დიპლომატიური დაძაბულობა ორ ქვეყანას შორის კვლავ ნარჩუნდება“, - ნათქვამია სტატიაში.

ორელიან ლეშევალიეს, მაკრონის მრავალწლიან მოკავშირეს, თანამდებობა მომავალ თვეში უნდა დაეკავებინა, თუმცა მისი დანიშვნა აშშ-ის სახელმწიფო დეპარტამენტს ჯერ კიდევ არ დაუდასტურებია - პროცესი, რომელიც მოკავშირე ქვეყნებს შორის, როგორც წესი, წმინდა ფორმალობაა.

საკითხში ჩახედული ორი პიროვნების ცნობით, ტრამპის ადმინისტრაციამ წყენა გამოხატა ჟენევაში გაეროს საფრანგეთის მისიის მიერ სოციალურ ქსელში გამოქვეყნებული პოსტის გამო. პოსტში გაკრიტიკებული იყო ვაშინგტონის გადაწყვეტილება, რომელმაც რუსეთსა და ჩრდილოეთ კორეას დაუჭირა მხარი გაეროს ადამიანის უფლებათა უმაღლესი კომისრის, ფოლკერ ტურკის მანდატის გაგრძელების წინააღმდეგ.

„შეერთებული შტატები ძალიან იმედგაცრუებულია ფრანგული მხარის უპასუხისმგებლო და უპატივცემულო რიტორიკით“, - განაცხადა სახელმწიფო დეპარტამენტის ოფიციალურმა წარმომადგენელმა ლეშევალიეს დამტკიცების პროცესთან დაკავშირებით დასმული წერილობითი კითხვის საპასუხოდ. - „ჩვენ მათ კომენტარებს შესაბამისად ვუპასუხებთ“.