გაეროს ასამბლეას ირანის პრეზიდენტი და საგარეო საქმეთა მინისტრი დაესწრებიან - აშშ-მა მათ ვიზები მისცა

აშშ-ის პრეზიდენტ დონალდ ტრამპის ადმინისტრაციამ ნიუ-იორკში გაეროს გენერალური ასამბლეის მაღალი დონის კვირეულზე დასასწრებად ირანის პრეზიდენტ მასუდ ფეზეშქიანსა და საგარეო საქმეთა მინისტრ აბას არაღჩის ვიზები დაუმტკიცა.

Associated Press-ის ინფორმაციით, აშშ-ის სახელმწიფო დეპარტამენტმა შესაბამისი ნებართვა მხოლოდ ირანის ძირითად დელეგაციასა და აუცილებელ პერსონალზე გასცა. ამერიკული მხარის განცხადებით, ნაკისრი საერთაშორისო ვალდებულებების შესაბამისად, ოფიციალური თეირანის საკვანძო დელეგაცია ასამბლეის მუშაობაში მონაწილეობის მიღებას შეძლებს.

საყურადღებო ფაქტია, რომ ამერიკის შეერთებული შტატები ირანულ დელეგაციას გადაადგილების მკაცრ შეზღუდვებს დაუწესებს. დადგენილი წესების თანახმად, ირანის წარმომადგენლებს ფუფუნების საგნებისა და გარკვეული კატეგორიის სხვა პროდუქციის შეძენა აეკრძალებათ. სახელმწიფო დეპარტამენტის განცხადებით, 2026 წლის წარმომადგენლობითი მისია 2025 წლის დელეგაციასთან შედარებით რაოდენობრივად ბევრად უფრო მცირე იქნება.