POLITICO: ევროკავშირი ჩიხში შევიდა საფრანგეთის მცდელობის გამო, სანქცირებულთა სიიდან ამოიღოს რუსი ოლიგარქი

ევროკავშირის წევრები ვერ თანხმდებიან, მოეხსნას თუ არა სანქციები რუს ოლიგარქს, ალიშერ უსმანოვს, რომელიც იმ ასობით ბიზნესმენისა და პოლიტიკოსის სიაშია, რომელთაც ბრალი ედებათ უკრაინაში რუსეთის მიერ წარმოებული ომის მხარდაჭერაში, - წერს გამოცემა POLITICO.

ბლოკის წევრი ქვეყნების ელჩები ბრიუსელში ორშაბათს შეიკრიბნენ ევროკავშირის სანქციების რეჟიმის განსახილველად, რაც ყოველ ექვს თვეში ერთხელ კონსენსუსით განახლებას ექვემდებარება.

აღნიშნული დისკუსია მოჰყვა მიმდინარე თვის დასაწყისში საფრანგეთის მიერ გადადგმულ მოულოდნელ ნაბიჯს, როდესაც მან სლოვაკეთის პოზიცია გაიზიარა და ეროვნული უსაფრთხოების დაუსახელებელი მოტივით, ცნობილი რუსი ბიზნესმენის, ალიშერ უსმანოვის სანქციებიდან მოხსნა მოითხოვა.

„ეს გადაწყვეტილება ყველას აღიზიანებს“, - განაცხადა იმ ქვეყნის დიპლომატმა, რომელიც ამ ნაბიჯს ეწინააღმდეგება. მისივე თქმით, როდესაც ერთ-ერთმა ელჩმა ინიციატივა გააკრიტიკა, მის პოზიციას „ევროკავშირის კიდევ 11-მა წევრმა სახელმწიფომ დაუჭირა მხარი“.

პარიზის პოზიციის გამო, სამშაბათს ვადა ეწურება 3 000-მდე სანქციას, მათ შორის უსმანოვის წინააღმდეგ. როგორც დიპლომატიურმა წყაროებმა განაცხადეს, წევრ ქვეყნებს შორის აზრთა სხვადასხვაობა მაინც დიდია. საფრანგეთი პირობას დებს, რომ დააწესებს დამცავ ზომებს, რათა თავიდან აიცილოს სანქციების საერთო სისტემის შერყევა.