POLITICO: ევროკავშირი მონტენეგროსთვის, უკრაინისთვის, მოლდოვისა და ალბანეთისთვის გაწევრიანების სამოქმედო გეგმებს ამზადებს

ევროკავშირი ოთხი ქვეყნისთვის, რომლებიც გაერთიანებაში გაწევრიანებასთან ყველაზე ახლოს არიან, მკაფიო, ეტაპობრივ გეგმებს ამზადებს. ინფორმაციას POLITICO ავრცელებს.

გამოცემის ცნობით, ახალი ინიციატივა მათ ევროკავშირში გაწევრიანების პროცესის დაჩქარების შესაძლებლობას მისცემს, მაშინ როდესაც სხვა კანდიდატი ქვეყნები კვლავ ჩამორჩებიან.

ევროკომისიის ორი მაღალჩინოსნის ინფორმაციით, რომლებიც დოკუმენტის მომზადებაში მონაწილეობენ, ევროკავშირი მონტენეგროსთვის, უკრაინისთვის, მოლდოვისა და ალბანეთისთვის სპეციალური სამოქმედო გეგმების შემუშავებას განიხილავს.

როგორც POLITICO წერს, ინიციატივა მიზნად ისახავს გაწევრიანების ათწლეულების განმავლობაში გაჭიანურებული პროცესის დაჩქარებას.

ოთხივე ქვეყანა ევროკავშირში გაწევრიანების მთავარ კანდიდატად მიიჩნევა, თუმცა მათი პროგრესი კვლავ ნელია და გაერთიანებაში ოფიციალურად მიღების ვადები გაურკვეველი რჩება. მიუხედავად იმისა, რომ ბრიუსელი დიდი ხანია მხარს უჭერს მათ გაწევრიანებას, ახალი სამოქმედო გეგმები პირველად ითვალისწინებს გარანტიებს, რომ აუცილებელი რეფორმების გატარების შემთხვევაში ქვეყნები ევროკავშირში გაწევრიანებას შეძლებენ. ამასთან, მათ გაწევრიანების შესახებ მოლაპარაკებების დასრულების სავარაუდო ვადებიც განესაზღვრებათ.

ევროკომისიის ერთ-ერთი მაღალჩინოსნის განცხადებით, სამოქმედო გეგმებში უფრო მკაფიოდ იქნება განსაზღვრული, კონკრეტულად რა მოეთხოვებათ კანდიდატ ქვეყნებს. ამასთან, გეგმები გარკვეულ ვალდებულებებს ევროკავშირის მოქმედ წევრებსაც დაუწესებს, რომელთა თანხმობაც გაწევრიანების პროცესის გაგრძელებისთვის აუცილებელია.

გეგმებში ასევე განისაზღვრება სავარაუდო ვადები იმ რეფორმების ჯგუფების დასასრულებლად, რომლებიც მოლაპარაკებების კლასტერების სახელით არის ცნობილი. მათი დასრულება ევროკავშირში გაწევრიანების გზაზე მნიშვნელოვან ეტაპებს წარმოადგენს.

ევროკომისიის პრეზიდენტმა ურსულა ფონ დერ ლაიენმა სექტემბრის დასაწყისში, ევროკავშირის მდგომარეობის შესახებ ყოველწლიური მოხსენებით გამოსვლისას, პირობა დადო, რომ გაერთიანება მიზნობრივ დახმარებას გაუწევდა იმ კანდიდატ ქვეყნებს, რომლებმაც ყველაზე მეტ პროგრესს მიაღწიეს.

თუმცა, ევროკომისიის წარმომადგენლების ინფორმაციით, ამ ეტაპზე სამოქმედო გეგმები არ შეეხება გაწევრიანების პროცესის უფრო ადრეულ ეტაპზე მყოფ ქვეყნებს, მათ შორის კოსოვოს, ჩრდილოეთ მაკედონიასა და ბოსნია და ჰერცეგოვინას. ინიციატივა ასევე არ გავრცელდება საქართველოზე, თურქეთსა და სერბეთზე. ევროკომისია აღნიშნულ ქვეყნებს დემოკრატიულ უკუსვლაში ადანაშაულებს, წერს გამოცემა.

ევროკომისიის წარმომადგენელმა დაადასტურა, რომ ახალი სამოქმედო გეგმები „გაწევრიანების შესახებ მოლაპარაკებების დასრულების გზას განსაზღვრავს. ისინი მოიცავს მკაფიო პრიორიტეტებს, ვადებსა და კონკრეტულ ვალდებულებებს, რაც ყველაზე წინ წასულ კანდიდატ ქვეყნებს აუცილებელი რეფორმების დასრულებაში დაეხმარება“.

ევროკავშირის ლიდერები სულ უფრო მეტად ცდილობენ, გააძლიერონ ურთიერთობები სხვა დემოკრატიულ სახელმწიფოებთან, რომლებიც თავისუფალი ვაჭრობის მომხრეები არიან, განსაკუთრებით კი ევროკავშირის მეზობელ ქვეყნებთან. ამის მიზეზია პარტნიორებთან, მათ შორის აშშ-თან, არსებული დაძაბულობა, ჩინეთის სავაჭრო პოლიტიკა და რუსეთისგან მომდინარე საფრთხეები.

ევროპელი მაღალჩინოსნები შიშობენ, რომ ევროკავშირში გაწევრიანების პროცესი ზედმეტად დიდხანს გრძელდება, რაც კანდიდატ ქვეყნებში იმედგაცრუებას იწვევს და მათ რუსეთისა თუ სხვა მეტოქეების ზეწოლის მიმართ უფრო მოწყვლადს ხდის, აღნიშნულია სტატიაში.