POLITICO: მიუხედავად იმისა, რომ რუსეთი აძლიერებს თავდასხმებს ევროპის კრიტიკულ ინფრასტრუქტურასა და იარაღის ქარხნებზე, ნატოს ქვეყნები კვლავ ფრთხილობენ ისეთი მკაცრი ნაბიჯების გადადგმისგან, რომლებმაც შესაძლოა კრემლის პროვოცირება გამოიწვიოს

მიუხედავად იმისა, რომ რუსეთი აძლიერებს თავდასხმებს ევროპის კრიტიკულ ინფრასტრუქტურასა და იარაღის ქარხნებზე, ნატოს ქვეყნები კვლავ ფრთხილობენ ისეთი მკაცრი ნაბიჯების გადადგმისგან, რომლებმაც შესაძლოა კრემლის პროვოცირება გამოიწვიოს, - წერს გამოცემა POLITICO.

ნატოს სამი დიპლომატისა და საკითხში ჩახედული წყაროს ცნობით, ევროპული ქვეყნების მთავრობები სხვადასხვა შესაძლებლობას განიხილავენ. მათ შორისაა, მსჯელობის დაწყება იმის თაობაზე, შეიძლება თუ არა ამოქმედდეს ნატოს მე-5 მუხლი ე.წ. ჰიბრიდული თავდასხმის შემთხვევაში, ინციდენტებზე პასუხის გაცემისას უფრო ერთიანი პოზიციის დაფიქსირება და კრიტიკული ინფრასტრუქტურის უსაფრთხოების უზრუნველყოფის გაძლიერება.

თუმცა ჯერჯერობით ევროპა მკვეთრი ნაბიჯების გადადგმას ერიდება - ნაწილობრივ იმის შიშით, რომ ეს შესაძლოა რუსეთთან სრულმასშტაბურ ომში გადაიზარდოს.

„ჩვენ საპასუხო ზომების ყველა ვარიანტს ვფლობთ. ზოგიერთი მათგანი საჯარო იქნება, ზოგი კი - არა“, - განუცხადა ნატოს გენერალურმა მდივანმა, მარკ რუტემ POLITICO-ს. - „მე ვეუბნები [რუსეთის პრეზიდენტ ვლადიმირ] პუტინს და ყველას, ვისაც მოსმენა სურს: თუ ამას გააგრძელებთ, ჩვენ არა მხოლოდ საპასუხო ზომებს მივმართავთ, არამედ უკრაინის მხარდაჭერასაც გავაგრძელებთ“.

ქმედითი ნაბიჯების გადადგმისკენ მოწოდებები ხაზს უსვამს მზარდ შეშფოთებას დივერსიების, კიბერშეტევებისა და იმ სხვა ქმედებების გახშირების გამო, რომლებიც ევროპაში კონვენციური ომის ზღვარს მიღმა ექცევა.

გასულ უქმეებზე, პოლონეთ-უკრაინის საზღვართან რუსულმა დრონმა მატარებელს დაარტყა. ამავდროულად, ბულგარეთის ხელისუფლებამ გამოძიება დაიწყო ქვეყნის ტერიტორიაზე არსებულ იარაღის საწყობებში მომხდარ ორ აფეთქებაზე.

„პოლონეთის საზღვარზე განვითარებული მოვლენების ფონზე წნეხი იმატებს“, - განაცხადა ნატოს მაღალი რანგის ერთ-ერთმა დიპლომატმა. თუმცა ამ ეტაპზე სტრატეგია ასეთია: „შევინარჩუნოთ სიმშვიდე, განვაგრძოთ საქმიანობა და გავაგრძელოთ უკრაინის მხარდაჭერა“.