რუსეთმა სასმლის იმპორტი კიდევ 3 ქართულ კომპანიას შეუზღუდა

რუსეთმა სასმლის შეტანა კიდევ 3 ქართულ კომპანიას შეუზღუდა - ამის შესახებ ინფორმაციას პრორუსი ბიზნესმენი, "სოლიდარობა მშვიდობისთვის" ლიდერი მამუკა ფიფია ავრცელებს. ამის შესახებ მან BMge-სთან განაცხადა.

მისი ინფორმაციით, ეს კომპანიებია: GWS-Wine-Company, "შატო მუხრანი" და "ვინივერია". ფიფიამ BMge-ს უთხრა, რომ შესაბამისი სამართლებრივი აქტი მალე გამოიცემა.

"სამწუხაროდ, სანქციების მეორე ტალღაში მოყვა "შატო მუხრანი" და "ვინ ივერია". "მარუსია ბევერიჯის ჯორჯიას" აქციონერები არიან პატრიკ ხოდენი და ელენა ნადიბაძე. ეს ადამიანები ადრე იყვნენ ფონდ "უკრაინის რეკონსტრუქციის" დირექტორები, ასევე შემჩნეულები არიან უკრაინის ხელისუფლების დაფინანსებაში.

"ვინივერია" ატარებდა აუქციონს უკრაინის ტერიტორიაზე და ამ აუქციონიდან ფული პირდაპირ მიდიოდა უკრაინის შეიარაღებულ ძალებში, უკრაინის ჯარს აფინანსებდა. ეს განცხადება გაკეთდება ამ დღეებში. ძალიან სამწუხაროა", - თქვა BMge-სთან ფიფიამ.

10 ოქტომბერს გავრცელდა ცნობა, რომ რუსეთმა საქართველოდან გარკვეული ალკოჰოლური და არაალკოჰოლური სასმელების იმპორტი აკრძალა. კერძოდ, რუსეთმა აკრძალა: "ნაბეღლავის", "კოკა-კოლას", "თელიანი ველის", "თბილღვინოს", "ძმები ასკანელების", "ვაინმენისა" და ქართული ლუდის კომპანიის პროდუქტების იმპორტი.