POLITICO: ნატოს შიდა გამოკითხვის შედეგები აჩვენებს, რომ ტრამპის კრიტიკის კვალდაკვალ, ამერიკულ საზოგადოებაში ნატოს მიმართ ნდობა მცირდება

POLITICO-ს მიერ მოპოვებული ნატოს შიდა გამოკითხვის თანახმად, ამერიკელთა ნახევარზე ნაკლებს სჯერა, რომ თავდასხმის შემთხვევაში ნატო მათ მხარში დაუდგება.

ეს მონაცემები მას შემდეგ გამოიკვეთა, რაც აშშ-ის პრეზიდენტმა დონალდ ტრამპმა სამხედრო ალიანსი არაერთხელ გააკრიტიკა.

მონაცემების თანახმად, კითხვაზე, შეასრულებს თუ არა ნატო თავის პირობას და დაეხმარება თუ არა მათ ქვეყანას თავდასხმის შემთხვევაში, აშშ-ის ზრდასრული მოსახლეობის მხოლოდ 43%-მა უპასუხა დადებითად. ეს ნატოს 32 მოკავშირეს შორის ყველაზე დაბალი მაჩვენებელია, მაშინ როცა ალიანსის მასშტაბით საშუალო მაჩვენებელი 57%-ს შეადგენს.

„ეს შესაძლოა იყოს ტრამპის რიტორიკაზე რეაქცია, რომლითაც ის ეჭვქვეშ აყენებს ნატოს მე-5 მუხლის კოლექტიური თავდაცვის პრინციპს“, - განაცხადა გერლინდ ნიჰუსმა, უსაფრთხოების სფეროში ექსპერტმა და ნატოს ყოფილმა თანამშრომელმა. მან აღნიშნა, რომ აშშ-ის მოსახლეობაში დამკვიდრებული ეს ნარატივი არის „ამ ვარდნის ლოგიკური ახსნა“.

ტრამპი მწვავედ აკრიტიკებდა ნატოს იმ წევრებს, რომლებიც ირანში ამერიკის სამხედრო ოპერაციების მხარდაჭერისგან თავს იკავებდნენ. იგი მუდმივად იმუქრებოდა საპასუხო ზომებით, ალიანსს „ქაღალდის ვეფხვი“ უწოდა და ამტკიცებდა, რომ საჭიროების შემთხვევაში ევროპული სახელმწიფოები მათ არ დაეხმარებოდნენ.

გასულ კვირას, ნატოს ლიდერების ანკარაში დაგეგმილი სამიტის წინ, აშშ-ის პრეზიდენტმა ალიანსის კრიტიკა კიდევ უფრო გაამძაფრა.

„სასაცილოა, რომ აშშ აგრძელებს ამ ცალმხრივ გზას მაშინ, როდესაც ურთიერთობა ორმხრივი არ არის“, - დაწერა მან პარასკევს.