POLITICO: რუსეთის წინააღმდეგ ლინდსი გრემის მიერ შედგენილმა სანქციების კანონპროექტმა წარმომადგენელთა პალატაში პროცედურული ბარიერი გადალახა

აშშ-ის კონგრესის წარმომადგენელთა პალატაში რუსეთის წინააღმდეგ ფართომასშტაბიანი სანქციების შესახებ კანონპროექტმა, რომლის ერთ-ერთი მთავარი ინიციატორი გარდაცვლილი სენატორი ლინდსი გრემი იყო, პროცედურული ბარიერი გადალახა. ინფორმაციას POLITICO ავრცელებს.

გამოცემის ცნობით, კანონპროექტს, სავარაუდოდ, კვირის ბოლოს უყრიან კენჭს.

წარმომადგენელთა პალატის წესების კომიტეტმა კანონპროექტის შემდგომ წინსვლას მხარი დაუჭირა. მანამდე კანონმდებლებს შორის მწვავე კამათი გაიმართა იმ დებულების გამო, რომელიც თეთრ სახლს ტარიფების დაწესების დამატებით უფლებამოსილებას ანიჭებს.

„დღეს გვაქვს შესაძლებლობა დავეხმაროთ ევროპაში ომის დასრულებას და მთელ მსოფლიოში ძალის დემონსტრირებით მშვიდობის დამყარებას“, - განაცხადა მოსმენაზე ტეხასის შტატის „რესპუბლიკელმა“ კონგრესმენმა მაიკლ მაკკოლმა.

მისი თქმით, კანონპროექტის წინააღმდეგ წასვლა ან უმოქმედობა მოსკოვს გააძლიერებს და ისეთ მოწინააღმდეგეებს, როგორებიც ჩრდილოეთ კორეა და ირანია, აგრესიული მოქმედებების გაგრძელებისკენ უბიძგებს.

თუმცა წარმომადგენელთა პალატაში საბოლოო დამტკიცებამდე კანონპროექტს ჯერ კიდევ რამდენიმე დაბრკოლების გადალახვა მოუწევს. „რესპუბლიკელთა“ ლიდერებს შესაძლოა პალატის პლენარულ სხდომაზე პროცედურული წინააღმდეგობები შეექმნათ, როდესაც პარტიული ხაზით კენჭისყრა გაიმართება დებატებისთვის გამოყოფილი დროის დასადგენად, წერს გამოცემა.

აღსანიშნავია, რომ თუ კანონმდებლები კანონპროექტს მიმდინარე კვირას არ უყრიან კენჭს, მისი განხილვა შუალედური არჩევნების შემდეგ გადაიდება, რადგან წარმომადგენელთა პალატა მომავალ კვირას კვლავ დატოვებს ვაშინგტონს და კონგრესმენები საკუთარ ოლქებში წინასაარჩევნო კამპანიას დაუბრუნდებიან.

წარმომადგენელთა პალატის სპიკერმა მაიკ ჯონსონმა ჟურნალისტებთან საუბრისას განაცხადა, რომ შესაძლოა პროცედურული პრობლემების თავიდან აცილება კანონპროექტის დაჩქარებული წესით განხილვით შეძლოს. ამ შემთხვევაში მის დასამტკიცებლად ორივე პარტიის წარმომადგენელთა ხმების ორი მესამედი იქნება საჭირო.

„მჯერა, რომ ხმები გვექნება“, - განაცხადა ჯონსონმა და დასძინა, რომ თუ პროცედურული წესის შესახებ კენჭისყრა ჩავარდება, ის კანონპროექტის დაჩქარებულ განხილვაზე, ე.წ. „წესების შეჩერების“ პროცედურაზე გადავა.

POLITICO-ს ცნობით, სანქციების კანონპროექტს, რომელსაც თეთრი სახლი მხარს უჭერს, აგვისტოში სენატმა აბსოლუტური, ორპარტიული უმრავლესობით დაუჭირა მხარი. თუმცა ზაფხულის არდადეგების შემდეგ მისი წინსვლა შენელდა, რასაც „რესპუბლიკელთა“ მხრიდან მხარდაჭერის შესუსტება და „დემოკრატების“ მზარდი წინააღმდეგობა მოჰყვა.

ბევრი „დემოკრატი“ კანონპროექტის წინააღმდეგია, რადგან მიიჩნევს, რომ ის თეთრ სახლს ტარიფების დაწესების ზედმეტად ფართო უფლებამოსილებას მიანიჭებს იმ ფონზე, როდესაც პრეზიდენტის ადმინისტრაცია უკვე აქტიურად იყენებს ტარიფებს როგორც მოკავშირეების, ისე მოწინააღმდეგეების წინააღმდეგ.

კანონპროექტი ითვალისწინებს რუსეთის ხელმძღვანელობისა და ენერგეტიკის სექტორის წინააღმდეგ სავალდებულო სანქციების დაწესებას, ასევე ზომებს მოსკოვის თავდაცვის ინდუსტრიის თანამშრომლებისა და ე.წ. „ჩრდილოვანი ფლოტის“ წინააღმდეგ. გარდა ამისა, კანონპროექტი პრეზიდენტ დონალდ ტრამპს რუსეთის ნავთობის უმსხვილესი მყიდველებისთვის 100%-იანი ტარიფების დაწესების უფლებამოსილებას მისცემს.