პოლონელი ევროპარლამენტარი დომინიკ ტარჩინსკი აცხადებს, რომ ის დიდ ბრიტანეთში არ შეუშვეს - ბრიტანეთი პრემიერ-მინისტრ კირ სტარმერის მოსვლამდე სანიმუშო იყო
პოლონელი ევროპარლამენტარი დომინიკ ტარჩინსკი გაერთიანებული სამეფოს პრემიერ-მინისტრს კირ სტარმერს დემოკრატიაზე თავდასხმაში ადანაშაულებს და მის ქმედებებს კომუნისტურს უწოდებს.
ტარჩინსკი ბრიტანეთის ყოფილი პრემიერ-მინისტრის ლიზ ტრასის პოდკასტში აცხადებს, რომ 16 მაისს ლონდონში დაგეგმილ მსვლელობაზე დასწრება სურდა, თუმცა გაერთიანებული სამეფოს საგარეო უწყებამ მას ქვეყანაში შესვლა აუკრძალა.
ტარჩინსკის თქმით, იგი კირ სტარმერის მხრიდან მისი მემარჯვენე პოლიტიკური შეხედულებების გამო იდევნება.
„გაოგნებული ვიყავი. ვერასდროს ვიფიქრებდი, რომ დემოკრატიული სახელმწიფო ევროპარლამენტის მოქმედ, ხალხის მიერ არჩეულ დეპუტატს დაბლოკავდა, მით უმეტეს დიდი ბრიტანეთი. ბრიტანეთი პრემიერ-მინისტრ კირ სტარმერის მოსვლამდე სანიმუშო იყო. როცა ევროპარლამენტის დემოკრატიულად არჩეულ დეპუტატს დიდ ბრიტანეთში ვიზიტს უკრძალავენ, ეს კვლავ დემოკრატიად ითვლება?! მე ამის გამო ვუწოდებ მას კომუნისტს, რადგან ეს კომუნისტური პრაქტიკაა და არაფერი აქვს საერთო დემოკრატიასთან. მან დამბლოკა, ვინაიდან არ მოსწონს ჩემი პოლიტიკური შეხედულებები. ეს კი დემოკრატია არაა. მას არ აქვს უფლება მე, მემარჯვენე აგიტატორი და სიძულვილის გამავრცელებელი მიწოდოს. ამით მე, ჩემს სახელს და ქვეყანას ზიანი მოგვადგა და აუცილებლად წავალ სასამართლოში“, - განაცხადა მან.
იმედი
წყარო: imedinews.ge