პოლონეთის თავდაცვის მინისტრი უკრაინის მთავრობას მოუწოდებს, პოლონელების გენოციდში დამნაშავე სამხედრო დანაყოფისთვის სახელის მინიჭების გადაწყვეტილებას გადახედოს

პოლონეთის თავდაცვის მინისტრი ვლადისლავ კოსინიაკ-კამიში უკრაინის ხელისუფლებას მოუწოდებს, პოლონელების გენოციდში დამნაშავე სამხედრო დანაყოფისთვის სახელის მინიჭების გადაწყვეტილებას გადახედოს.

ის კიევს ურჩევს, ნამდვილი გმირები განადიდოს და არა ისინი, ვინც პოლონელების მკვლელობაში მონაწილეობდნენ.

მინისტრმა ვიდეო მიმართვა გაავრცელა, სადაც თქვა, რომ უკრაინის მტკიცე მხარდამჭერი პოლონეთისთვის უკრაინის პრეზიდენტის ვოლოდიმირ ზელენსკის გადაწყვეტილება მტკივნეულია და პროტესტს იწვევს.

„ვოლინში მოკლეს ათობით ათასი პოლონელი - ქალები, ბავშვები და ხანდაზმულები. სრულად გაანადგურეს ოჯახები და დასახლებები. ამ ტკივილის შემსუბუქება შეუძლებელია. გენოციდი გენოციდად რჩება. გადახედეთ გადაწყვეტილებას, გამონახეთ გზა ვითარების მოსაგვარებლად. ეს სიმწიფის, პასუხისმგებლობისა და პატივისცემის ნიშანი იქნება იმ ადამიანების მიმართ, რომლებიც უკრაინის გვერდით იდგნენ ყველაზე რთულ მომენტში. პოლონეთი უკრაინის მხარეს დარჩება რუსული იმპერიალიზმის წინააღმდეგ ბრძოლაში. თუმცა ნამდვილი მეგობრობა სიმართლეს მოითხოვს. სიმართლე კი ასეთია: პოლონელებისთვის „უკრაინის მეამბოხე არმიის“ განდიდება მიუღებელია“, - განაცხადა კოსინიაკ-კამიშმა ვიდეომიმართვის დროს.

ცნობისთვის, რამდენიმე დღის წინ უკრაინის პრეზიდენტმა ვოლოდიმირ ზელენსკიმ უკრაინის შეიარაღებული ძალების ერთ-ერთ ქვედანაყოფს „უკრაინის მეამბოხე არმიის გმირების“ სახელი მიანიჭა. პოლონური მხარე მიიჩნევს, რომ „უკრაინის მეამბოხე არმია“ ვოლინის ტრაგედიასთან არის დაკავშირებული.