ფონ დერ ლაიენი: უკრაინას ომის ყველაზე მძიმე ზამთრის გადალახვაში დავეხმარებით

ევროკომისიის პრეზიდენტი ურსულა ფონ დერ ლაიენი აცხადებს, რომ ევროკავშირი უკრაინის მხარდაჭერას გააგრძელებს, რათა ქვეყანამ ომის „ყველაზე მძიმე ზამთარი“ გადაიტანოს.

მისი თქმით, დახმარება მოიცავს როგორც ჰუმანიტარულ მხარდაჭერას, ისე უკრაინის ენერგეტიკული ინფრასტრუქტურის აღდგენას.

„ჩვენ გავაძლიერებთ უკრაინის საჰაერო თავდაცვას. გასულ კვირას, პირველად, შევთანხმდით ამერიკული Patriot-ის საჰაერო თავდაცვის რაკეტების შესყიდვაზე. ახლა მათი სასწრაფოდ მიწოდებაა საჭირო“, – განაცხადა ფონ დერ ლაიენმა ევროპარლამენტში სიტყვით გამოსვლისას.

ევროკომისიის პრეზიდენტი აღნიშნავს, რომ აღნიშნული სამხედრო დახმარება უკრაინისთვის გამოყოფილი 90 მილიარდი ევროს ოდენობის სესხის ფარგლებში განხორციელდება.

„თუმცა, ჩვენ ასევე ერთად უნდა ვიმუშაოთ, რათა ერთ მომწოდებელზე დამოკიდებულება შევამციროთ. სწორედ ამიტომ, უკრაინასთან ერთად გვინდა, შევიმუშაოთ ხელმისაწვდომი და მოდულური სარაკეტო თავდაცვის სისტემა“, – განაცხადა მან.