ფრანგი პარლამენტარი საქართველოს საწინააღმდეგო რეზოლუციაზე: როგორც წესი, ჩვენ სხვა ქვეყნის პოლიტიკურ ცხოვრებაში არ ვერევით - საქართველო საფრანგეთის კარგი მეგობარია, იმედი მაქვს, ეს არ მოახდენს გავლენას ფრანგულ-ქართულ ურთიერთობებზე

როგორც წესი, ჩვენ სხვა ქვეყნის პოლიტიკურ ცხოვრებაში არ ვერევით, რადგან პირველ რიგში ჩვენ არ ვიცით მსოფლიოს ყველა ქვეყნის პოლიტიკური სიტუაცია, - განუცხადა „ქრონიკას“ საფრანგეთის ეროვნული ასამბლეის წევრმა გიიომ ბიგომ.

იგი ასე გამოეხმაურა საფრანგეთის ეროვნული ასამბლეის მიერ საქართველოს საწინააღმდეგო რეზოლუციის მიღებას. გიიომ ბიგო იმედოვნებს, რომ ეს რეზოლუცია ორი ქვეყნის ურთიერთობაზე გავლენას არ მოახდენს.

„საქართველო საფრანგეთის კარგი მეგობარია. ეს არის ქვეყანა, რომლის ისტორიული წარსული დაკავშირებულია საფრანგეთთანაც. ასე რომ, იმედი მაქვს ეს არ მოახდენს გავლენას ფრანგულ-ქართულ ურთიერთობებზე. ევროკავშირმა, საფრანგეთმა და ყველა წევრმა სახელმწიფომ პირველ პრიორიტეტად უნდა აქციოს, რომ არცერთ სხვა გარეშე ძალას, იქნება ეს რუსეთი, ჩინეთი, აშშ თუ კატარი, არ ჰქონდეს ჩვენს პირად პოლიტიკურ ცხოვრებაში ჩარევის შესაძლებლობა. ვიდრე სხვისი სახლის დასუფთავებას დაიწყებ, ჯერ შენი უნდა დაალაგო", - განაცხადა ეროვნული ასამბლეის წევრმა.

საფრანგეთის ეროვნულმა ასამბლეამ საქართველოს წინააღმდეგ რეზოლუცია მიიღო.