ფრიდრიხ მერცმა დონალდ ტრამპთან სატელეფონო საუბრისას უკრაინა და ჰორმუზის სრუტეში შექმნილი ვითარება განიხილა
გერმანიის კანცლერმა, ფრიდრიხ მერცმა აშშ-ის პრეზიდენტთან, დონალდ ტრამპთან სატელეფონო საუბრისას უკრაინა და ჰორმუზის სრუტეში შექმნილი ვითარება განიხილა. ამის შესახებ გერმანიის მთავრობის ოფიციალურმა წარმომადგენელმა, შტეფან კორნელიუსმა განაცხადა.
კორნელიუსის თქმით, საუბრისას მხარეებმა უკრაინაში კონფლიქტის დასასრულებლად შესაძლო ნაბიჯებზე იმსჯელეს. მან ასევე აღნიშნა, რომ მერცი მიესალმა აშშ-ის კონგრესის მიერ „გრემის სანქციების შესახებ კანონპროექტის“ მიღებას, რომელიც რუსეთის წინააღმდეგ სანქციებს ითვალისწინებს.
საუბრისას ასევე განიხილეს ჰორმუზის სრუტესა და წითელ ზღვაში განვითარებული მოვლენები. კორნელიუსის განცხადებით, ორივე ლიდერი შეთანხმდა, რომ აუცილებელია ორივე საზღვაო მარშრუტზე ნაოსნობის რაც შეიძლება სწრაფად აღდგენა.
გერმანიის კანცლერმა, ფრიდრიხ მერცმა მანამდე გააუქმა მომავალ კვირას ნიუ-იორკში დაგეგმილი ვიზიტი, სადაც გაეროს გენერალურ ასამბლეაში უნდა მიეღო მონაწილეობა. ვიზიტის გაუქმების მიზეზი რამდენიმე ფედერალურ მიწაზე დაგეგმილი მნიშვნელოვანი არჩევნები გახდა.
იმედი
წყარო: imedinews.ge