რატი იონათამიშვილი: ევრობიუროკრატები მიეჩვივნენ ცარიელი ტყვიების სროლას. აშკარავდება ღირებულებითი კრიზისი, რაც მთლიანად ევროპელ ბიუროკრატებში არსებობს დღეს

ევრობიუროკრატები მიეჩვივნენ ცარიელი ტყვიების სროლას. აშკარავდება ღირებულებითი კრიზისი, რაც მთლიანად ევროპელ ბიუროკრატებში არსებობს დღეს, - გამაცხადა „დღის ქრონიკასთან“ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა.

მისი თქმით, უსამართლო გადაწყვეტილებები, რომელსაც ევრობიუროკრატები იღებენ საქართველოსთან მიმართებით, ააშკარავებს იმ კრიზისს, რომელიც თავად ევროკავშირშია.

„ფაქტია, რომ ევრობიუროკრატები მიეჩვივნენ ცარიელი ტყვიების სროლას. ასეთი უსამართლო გადაწყვეტილებები უშედეგოა, მაგრამ ერთ კონკრეტულ შედეგამდე მაინც მივყავართ, რაც ჩემი აზრით ცუდი არ არის. აშკარავდება ღირებულებითი კრიზისი, რაც მთლიანად ევროპელ ბიუროკრატებში არსებობს დღეს. ეს კრიზისი ნამდვილად შემაშფოთებელია. ისინი იმდენად მიეჩვივნენ ორმაგ სტანდარტებს და უსამართლო გადაწყვეტილებებს, რომ ნამდვილად სრულად დაავიწყდათ ის ფუნდამენტური ღირებულებები, რაზეც დაფუძნდა თავის დროზე ევროკავშირი.

ცალკე საკითხი არის კიდევ მოლდოვასთან დაკავშირებული მედიის მიმართ განხორციელებული დისკრიმინაციული მიდგომა და გადაწყვეტილება, სადაც მათ მოუწიათ საგარეო საქმეთა მინისტრისგან ღირსეული გამოსვლა მოესმინათ. ამაზე იქაც პასუხები არ ჰქონიათ. ეს ადამიანები - იქნება ეს ევროპარლამენტის თუ მოლდოვის შემთხვევაში, იღებენ უსამართლო გადაწყვეტილებებს, შემდეგ ამის ახსნა-განმარტების უნარიც არ აქვთ. რა თქმა უნდა სათქმელიც არაფერი აქვთ და მისი გამართლებაც არ შეუძლიათ.

აქ ის უბადრუკობაც ჩანს, რომ ამას ყველაფერს საქართველოს მოქალაქეების ხელითაც აკეთებენ. ჩვენ ვნახეთ ის ადამიანები, ის „ღირსეული“ გამგრძელებლები დასმენების, რისი მემკვიდრეობაც მათ მიიღეს, რაც საბჭოთა კავშირის დროს იყო ხოლმე. ვინაიდან მენტალურად ისინი სწორედ საბჭოთა კავშირში არიან. საბოლოოდ ეს არის „რასა გორბაჩოვიანეების“ გადაწყვეტილებები, რასაც ჩვენთვის ფასი არ აქვს“, - განაცხადა რატი იონათამიშვილმა.

ევროპარლამენტმა ტელეკომპანია „იმედს” საქმიანობა ერთი წლით აუკრძალა, მოლდოვამ კი სამ ქართულ მაუწყებელს: „იმედს”, „რუსთავი 2“-სა და „პოს ტვ“-ის, აკრედიტაციაზე უარი განმარტების გარეშე უთხრა.