Reuters: აშშ-მა რუსეთი „დიდი ოცეულის“ სამიტის ფარგლებში გასამართ ენერგეტიკის მინისტრების შეხვედრაზე ოფიციალურად მიიწვია

თეთრი სახლის წარმომადგენლის ინფორმაციით, რუსი ოფიციალური პირი მომავალ კვირას ჰიუსტონში „დიდი ოცეულის“ ენერგეტიკულ შეხვედრას დაესწრება. ინფორმაციას Reuters-ი ავრცელებს.

სააგენტოს ცნობით, გასულ თვეში, 31 აგვისტოს, აშშ-მა რუსეთის ფინანსთა მინისტრი ანტონ სილუანოვი ჩრდილოეთ კაროლინაში „დიდი ოცეულის“ ქვეყნების შეხვედრაზე მიიწვია. ამ გადაწყვეტილებამ ევროპელი ოფიციალური პირების უკმაყოფილება გამოიწვია, რადგან ეს 2022 წელს რუსეთის მიერ უკრაინაში სრულმასშტაბიანი შეჭრის შემდეგ პირველი შემთხვევა იყო, როდესაც რუსეთის ფინანსთა მინისტრი G20-ის ფორუმს პირადად დაესწრო.

„დიდი ოცეულის“ მინისტერიალი „ენერგიის სიუხვის“ საკითხებზე 14-დან 16 სექტემბრამდე გაიმართება. შეხვედრას აშშ-ის მხრიდან დაესწრებიან შინაგან საქმეთა მდივანი დაგ ბერგუმი, ენერგეტიკის მდივანი კრის რაიტი და თეთრი სახლის წარმომადგენელი ჯაროდ აგენი. თეთრ სახლს ჯერჯერობით არ დაუკონკრეტებია, ვინ წარმოადგენს რუსეთს მომავალ კვირას დაგეგმილ შეხვედრაზე.

შეხვედრაში, სავარაუდოდ, ევროპის და აზიის ქვეყნების ენერგეტიკის სფეროს წარმომადგენლებიც მიიღებენ მონაწილეობას.

ევროკავშირის მცდელობები რუსულ ნავთობსა და გაზზე დამოკიდებულებისგან გათავისუფლდეს სირთულეს აწყდება. ამასობაში ევროკავშირი ზამთრის სეზონს ბუნებრივი აირის მარაგების უჩვეულოდ დაბალი დონით ხვდება, რის შესახებაც ბლოკის აუდიტორებმა სექტემბერში განაცხადეს, წერს სააგენტო.

მიუხედავად შეხვედრის სახელწოდებისა, უკრაინისა და ირანის ომებმა ენერგეტიკული უსაფრთხოება არაერთი ქვეყნისთვის სერიოზულ გამოწვევად აქცია.

როგორც სააგენტო იუწყება, მიმდინარე კვირაში აშშ-ში დიზელის ფასმა რეკორდულ მაჩვენებელს მიაღწია, გალონზე 6 დოლარს გადააჭარბა. ირანმა ჰორმუზის სრუტე ნავთობისა და ბუნებრივი აირის გადაზიდვებისთვის, ფაქტობრივად, დახურა, ხოლო აშშ-ში მონაცემთა ცენტრების მშენებლობის მასშტაბური ზრდა ელექტროენერგიის მიწოდებაზე ზეწოლას აძლიერებს.