Reuters: აშშ-მა რუსეთის VTB ბანკს ირანთან კავშირების გამო ახალი სანქციები დაუწესა

აშშ-მა რუსეთის სახელმწიფო კონტროლქვეშ მყოფ VTB ბანკს ახალი სანქციები დაუწესა. ინფორმაციას Reuters-ი ავრცელებს.

სააგენტოს ცნობით, ვაშინგტონი ბანკს ირანისთვის დასავლური სანქციების გვერდის ავლაში დახმარებაში ადანაშაულებს და აფრთხილებს უცხოურ ფინანსურ ინსტიტუტებს, რომლებსაც რუსეთის სიდიდით მეორე ბანკთან ბიზნესურთიერთობები ექნებათ, რომ მათ შესაძლოა დამატებითი სანქციები დაეკისროთ.

რუსეთის უკრაინაში შეჭრის გამო VTB-ს უკვე შეზღუდული აქვს წვდომა დოლარის ფინანსურ სისტემაზე. ახლა ბანკი ირანთან დაკავშირებულ სანქციებსაც დაექვემდებარა, რაც, აშშ-ის ხაზინის დეპარტამენტის განცხადებით, VTB-სთან თანამშრომლობის გაგრძელების შემთხვევაში უცხოურ ბანკებსა და კომპანიებს მეორეული სანქციების რისკს უქმნის.

აშშ-ის ხაზინის დეპარტამენტის განცხადებით, VTB-მ ირანში ოფისები გახსნა, სანქცირებულ ირანულ ბანკებთან საბანკო ურთიერთობები დაამყარა და ხელი შეუწყო ფინანსური არხების შექმნას, რომლებიც მოსკოვსა და თეირანს შორის ვაჭრობისა და ფინანსური კოორდინაციის გამარტივებას ისახავდა მიზნად.

სანქციები დაწესდა აღმასრულებელი ბრძანების საფუძველზე, რომელიც ირანის ეკონომიკაზე ზეწოლის გაძლიერებას ისახავს მიზნად. აღნიშნული სანქცია VTB-ის წინააღმდეგ აშშ-ის მიერ უკვე დაწესებულ სანქციებს ემატება, რომლებიც 2022 წლის თებერვალში, რუსეთის მიერ უკრაინაში სრულმასშტაბიანი შეჭრის შემდეგ ამოქმედდა, წერს Reuters-ი.

ხაზინის დეპარტამენტის განცხადებით, სახელმწიფო კონტროლქვეშ მყოფი VTB ახლა „მსოფლიოში ერთ-ერთი ყველაზე სრულად სანქცირებული ფინანსური ინსტიტუტია“.

უწყების განმარტებით, ირანთან დაკავშირებული ახალი სანქციები ზრდის მეორეული სანქციების დაწესების რისკს იმ უცხოური ფინანსური ინსტიტუტებისთვის, რომლებიც VTB-თან საქმიანობას გააგრძელებენ.

„ეკონომიკური გარიყულობის ოპერაციის“ ფარგლებში, ხაზინის დეპარტამენტი კვლავაც მიზანში ამოიღებს და შეაფერხებს მათ, ვინც ირანის რეჟიმს მატერიალურ, ტექნოლოგიურ ან ფინანსურ მხარდაჭერას უწევს და ამით რეჟიმს ტერორისტული საქმიანობის გაგრძელების შესაძლებლობას აძლევს“, - განაცხადა აშშ-ის ხაზინის მდივანმა სკოტ ბესენტმა.

მისი თქმით, ხაზინის დეპარტამენტი არ შეეგუება ირანის რეჟიმის მიმართ რაიმე სახის მხარდაჭერას და კვლავაც გამოავლენს, გამოააშკარავებს და იზოლაციაში მოაქცევს მათ, ვინც ისლამურ რესპუბლიკას ამაში ეხმარება.

ხაზინის დეპარტამენტის განცხადებით, ბოლო სამი წლის განმავლობაში VTB-მ ირანში საბანკო ოფისები გახსნა რუსეთსა და ირანს შორის ვაჭრობის გასაფართოებლად და ორ ქვეყანას შორის ფინანსური თანამშრომლობის გასაღრმავებლად.