Reuters: ირანთან ომი აშშ-ს უკვე 38 მილიარდი დოლარი დაუჯდა

ირანთან აშშ-ის ექვსთვიანი ომი ვაშინგტონს ამ დროისთვის 38 მილიარდი დოლარი დაუჯდა და ეს თანხა შესაძლოა ყოველთვიურად კიდევ 3 მილიარდი დოლარით გაიზარდოს. ინფორმაციას Reuters-ი აშშ-ის კონგრესის არაპარტიული საბიუჯეტო ოფისის (CBO) ანგარიშზე დაყრდნობით ავრცელებს.

კონგრესის საბიუჯეტო ოფისის მონაცემებით, ომი 2027 წლის პირველი სამი თვის განმავლობაში ინფლაციას 0,5 პროცენტული პუნქტით გაზრდის. შეფასება მოიცავს 1 აგვისტომდე გაწეულ ხარჯებს.

ომის მზარდმა ხარჯებმა აშშ-ის შეიარაღებაში არსებული საბრძოლო მასალის მარაგებზე ზეწოლა გაზარდა და ენერგიის ფასები გააძვირა. ეს კი აჩენს კითხვებს სხვა შესაძლო კონფლიქტებზე აშშ-ის რეაგირების შესაძლებლობებთან დაკავშირებით და დამატებით ტვირთად აწვება ისედაც გადატვირთულ ფედერალურ ბიუჯეტს, აღნიშნულია სტატიაში.

როგორც Reuters-ი იუწყება, რიცხვი 38 მილიარდი ახლოსაა თავდაცვის მდივან პიტ ჰეგსეტის მიერ 21 ივლისს სენატის მოსმენაზე დასახელებულ 37,5 მილიარდ დოლართან.

ხარჯების უდიდესი ნაწილი საბრძოლო მასალის მარაგების სწრაფ შემცირებას უკავშირდება. უწყების შეფასებით, აშშ-ის მარაგების სრულად შევსებას შესაძლოა ხუთი წელი დასჭირდეს. Reuters-მა აგვისტოში გაავრცელა ინფორმაცია, რომ ირანთან ომის პერიოდში აშშ-მა შორი მოქმედების ზუსტი დამიზნების მქონე რაკეტების „პრაქტიკულად ყველა“ მარაგი გამოიყენა.

თეთრი სახლის პრესსპიკერმა ანა კელიმ პრეზიდენტ დონალდ ტრამპის მიერ ირანზე განხორციელებულ თავდასხმებს „გადამწყვეტი მოქმედება“ უწოდა, რომლის მიზანიც თეირანის მიერ აშშ-ის სამხედრო მოსამსახურეებისა და ინტერესებისთვის ზიანის მიყენების თავიდან აცილება იყო. მისი განცხადებით, აშშ-ის სამხედრო ძალებს „საკმარისზე მეტი საბრძოლო მასალა, აღჭურვილობა და მარაგი“ აქვთ, რათა მთავარსარდლის ყველა სტრატეგიული მიზანი და უფრო მეტიც შეასრულონ.

პენტაგონის მთავარმა პრესსპიკერმა შონ პარნელმა კი საბრძოლო მასალის დეფიციტთან დაკავშირებით ანგარიშში მოყვანილი დასკვნები უარყო და განაცხადა: „ჩვენ გვაქვს ყველაფერი, რაც საჭიროა იმისთვის, რომ დარტყმა პრეზიდენტის მიერ შერჩეულ დროსა და ადგილზე განვახორციელოთ“.

ომის ხარჯების შესწავლა აშშ-ის წარმომადგენელთა პალატის საბიუჯეტო კომიტეტში „დემოკრატების“ ლიდერის, პენსილვანიის შტატის წარმომადგენელ ბრენდონ ბოილის მოთხოვნით ჩატარდა.

„დონალდ ტრამპის კატასტროფულმა ომმა ირანში უკვე შეიწირა მამაცი ამერიკელი სამხედრო მოსამსახურეების სიცოცხლე და სხვები დაჭრა“, - განაცხადა ბოილმა.

მისივე თქმით, ადამიანური დანაკარგების გარდა, CBO-ის არაპარტიული ანგარიში აჩვენებს, რომ ომმა ამერიკელ გადასახადის გადამხდელებს უკვე ათობით მილიარდი დოლარი დაუჯდა და ხარჯები კვლავ იზრდება.

ირანთან ომში აშშ-ის 18 სამხედრო მოსამსახურე დაიღუპა.