Reuters: ისრაელი და „ჰეზბოლა“ ცეცხლის შეწყვეტის შესახებ შეთანხმდნენ

ისრაელი და დაჯგუფება „ჰეზბოლა“ ლიბანში ცეცხლის შეწყვეტაზე შეთანხმდნენ. ინფორმაციას Reuters-ი აშშ-ის მაღალჩინოსანზე დაყრდნობით ავრცელებს.

სააგენტოს ცნობით, აღნიშნული ინფორმაცია მას შემდეგ გავრცელდა, რაც რეგიონში საბრძოლო მოქმედებების ესკალაციამ საფრთხე შეუქმნა ირანში ომის დასრულების შესახებ დროებითი შეთანხმების უფრო ფართო და გრძელვადიან ახლოაღმოსავლურ სამშვიდობო შეთანხმებად გარდაქმნის პერსპექტივას.

ამერიკელი ოფიციალური პირის განცხადებით, ცეცხლის შეწყვეტა ლიბანის დროით დაახლოებით 16:00 საათზე უნდა ამოქმედებულიყო.

„ჩვენი ინფორმაციით, დღევანდელი სროლების გაცვლის შემდეგ, ისრაელი და „ჰეზბოლა“ ახლა უკვე ცეცხლის შეწყვეტის რეჟიმზე შეთანხმდნენ“, - განაცხადა მან ანონიმურობის დაცვის პირობით.

მისივე თქმით, შეთანხმების მიღწევაში აშშ-ისა და კატარის წარმომადგენლები მონაწილეობდნენ, ხოლო პროცესში ირანიც იყო ჩართული.

როგორც სააგენტო იუწყება, ლიბანში დაძაბულობის გამწვავების შედეგად, ავიაიერიშებს 18 ადამიანი ემსხვერპლა, ხოლო „ჰეზბოლას“ მებრძოლებმა ოთხი ისრაელელი სამხედრო მოკლეს.

ანალიტიკოსების შეფასებით, ამ მოვლენებმა შესაძლოა მნიშვნელოვანი გავლენა მოახდინოს მიმდინარე მოლაპარაკებებზე, რადგან ლიბანში საბრძოლო მოქმედებების შეწყვეტა აშშ-სა და ირანს შორის უფრო ფართო შეთანხმების ერთ-ერთ ძირითად პირობად განიხილება.